وتكەن جىلى قانشا تورتەم، قانشا ۇشەم دۇنيەگە كەلدى

استانا. KAZINFORM - بىلتىر قازاقستاندا 388,4 مىڭ ءسابي دۇنيەگە كەلدى، ونىڭ 51,6 پايىزى - ۇلدار، 48,4 پايىزى - قىزدار.

230,3 مىڭ بالا قالالىق جەردە دۇنيەدە كەلسە، قالعان 158 مىڭ بالا اۋىلدىق جەردە دۇنيەگە كەلگەن، - دەپ حابارلايدى Massaget.kz ءتىلشىسى.

تۋۋدىڭ ەڭ جوعارى دەڭگەيى ماڭعىستاۋ وبلىسىندا (1000 تۇرعىنعا 26,74 ادام)، تۇركىستان وبلىسىندا (1000 تۇرعىنعا 26,18 ادام) جانە شىمكەنت قالاسىندا (1000 تۇرعىنعا 25,70 ادام) بايقالدى.

بالا تۋۋدىڭ نەگىزگى ۇلەسى 25-29 ارالىعىنداعى ايەلدەرگە تيەسىلى - 29 پايىز، 30-34 جاس ارالىعىنداعىلاردا - 26 پايىز. 20 جاسقا دەيىنگى ايەلدەر بىلتىر 12,6 مىڭ بالا، 50 جاستان اسقاندار 96 بالانى دۇنيەگە الىپ كەلگەن.

دۇنيەگە كەلگەن بالالاردىڭ 23 پايىزى، ياعني 90,7 مىڭى - وتباسىندا ەكىنشى بالا، وتباسىندا سەگىزىنشى بالا بولعانداردىڭ سانى 1 مىڭنان اسادى.

بىلتىر دۇنيەگە كەلگەن ەگىز سانى - 4075 (2022-جىلى 4063)، ۇشەم سانى - 48 (2022-جىلى 50)، تورتەم سانى - 1.