وتكەن جىلى ەلدە 15 قىلمىستىق توپتىڭ جولى كەسىلدى – ق ر ۇ ق ك باسشىسى پرەزيدەنتكە ەسەپ بەردى
استانا. KAZINFORM - مەملەكەت باسشىسى ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
ەرمەك ساعىمبايەۆ ۆەدومستۆونىڭ 2023-جىلعى جۇمىسىنىڭ نەگىزگى ناتيجەسى مەن الداعى كەزەڭگە ارنالعان جوسپارى تۋرالى مالىمەت بەردى؛
بىلتىر ۇ ق ك بولىمشەلەرى ەلىمىزدە ەكى تەررورلىق ارەكەتتىڭ جانە شەتەلدىڭ ارناۋلى قىزمەتتەرىمەن بىرگە وزگە مەملەكەتتەردىڭ اۋماعىندا ءۇش لاڭكەستىك اكسيانىڭ الدىن العانى جونىندە باياندادى:
لاڭكەستىك جانە ەكسترەميستىك قىلمىستار جاساعانى ءۇشىن 43 ادام سوتتالعان؛
جىل بويى ۇلتتىق قاۋىپسىزدىك كوميتەتىنىڭ ۇيلەستىرۋىمەن تەرروريزمگە قارسى 208 كوماندالىق- شتابتىق جانە 196 جەدەل-تاكتيكالىق وقۋ- جاتتىعۋ جيىنى وتكەن.
ەكونوميكالىق قاۋىپسىزدىكتى قامتاماسىز ەتۋ جانە ءجيى كەزدەسەتىن سىبايلاس جەمقورلىققا قارسى كۇرەس جۇمىستارىنىڭ ناتيجەسى جونىندە ايتتى:
قابىلدانعان شارالار ناتيجەسىندە جالپى 1,5 تريلليون تەڭگەدەن استام قارجى تۇسكەن، سونىڭ ىشىندە مەملەكەتتىك بيۋدجەتكە قايتارۋ باستاماسى اياسىندا 680 ميلليارد تەڭگەدەن اسا قارجى قايتارىلعان.
ىشكى ىستەر مينيسترلىگىمەن بىرلەسىپ، ۇيىمداسقان 15 قىلمىستىق توپ قىزمەتىنىڭ جولى كەسىلگەنى، 681 قارۋ مەن 85 مىڭنان استام وق-ءدارى تاركىلەنگەنى تۋرالى ايتتى:
ەسىرتكى بيزنەسىنە قارسى ءىس-قيمىل بويىنشا 36 زەرتحانا جويىلعان. 34 حالىقارالىق جانە 32 وڭىرلىك ەسىرتكى ارناسىنا توسقاۋىل قويىلىپ، 3,6 توننا ەسىرتكى تاركىلەنگەن؛
ۇ ق ك حالىقارالىق ىنتىماقتاستىق اياسىندا شەتەلدىك ارىپتەستەرىمەن ءبىرقاتار وپەراتسيانى جۇزەگە اسىرعان.
مەملەكەتتىك شەكارانى كۇزەتۋ سالاسىندا قۇقىق بۇزعان 31 مىڭنان استام ادام ۇستالعانىن جەتكىزدى. قارۋ-جاراق، وق-ءدارى جانە ەسىرتكى الىپ وتۋگە قاتىستى 739 ارەكەتكە، سونداي-اق جالپى سوماسى 11,7 ميلليارد تەڭگە بولاتىن ۆاليۋتا مەن التىندى، سوماسى 12,6 ميلليارد تەڭگەنى قۇرايتىن تاۋاردى تاسىمالداۋعا جول بەرىلمەگەن؛
ۇ ق ك تەحنيكالىق بولىمشەلەرى مەملەكەتتىك ورگانداردىڭ رەسۋرستارىنا جانە ەلدىڭ ماڭىزدى ستراتەگيالىق ينفراقۇرىلىم نىساندارىنا جاسالعان 86,3 ميلليون كيبەرشابۋىل مەن 2156 DDoS- شابۋىلدى تويتارعانىن جەتكىزدى.
قاسىم- جومارت توقايەۆ ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار ناقتى تاپسىرما بەردى.
اۆتور
ايدار وسپاناليەۆ
