وتكەن جىلى اينالىمنان 80 ميلليون تەڭگەدەن استام جالعان اقشا الىنعان

استانا. قازاقپارات - 2024 -جىلدىڭ باسىنان باستاپ قازاقستان اۋماعىندا اينالىمنان 2 مىڭعا جۋىق جالعان بانكنوتا الىنىپ، قارجىلىق تۇراقتىلىققا ەلەۋلى قاۋىپ ءتوندىردى، دەپ حابارلايدى ق ر قارجىلىق مونيتورينگ اگەنتتىگىنىڭ باسپا ءسوز قىزمەتى.

باسپا ءسوز قىزمەتىنىڭ مالىمەتتەرىنە قاراعاندا، جالپى الىنعان جالعان اقشالاردىڭ سوماسى 80 ميلليون تەڭگەدەن استى.

جالعان بانكنوتا جاساۋمەن جانە ساتۋمەن اينالىسقان 8 ادام سوتتالعان. ولار 5 جىلدان 6 جىلعا دەيىنگى مەرزىمگە باس بوستاندىعىنان ايىرىلعان.

- مۇنداي جاعدايلاردى بولدىرماۋ ءۇشىن اقشالاي وپەراتسيالار كەزىندە بانكنوتالاردى تەكسەرىڭىز. اقشا قاعازىنىڭ ساپاسىنا، قورعانىش ەلەمەنتتەرىنە (ءمورتاڭباسى، ميكروەلەمەنتتەرى، بەلگىلى ءبىر جارىقتا كورىنەتىن بەلگىلەرى) جانە تەكستۋرا مەن شريفتىنە نازار اۋدارىڭىز - دەلىنگەن اگەنتتىكتىڭ باسپا ءسوز قىزمەتى تاراتقان اقپاراتتا.

ق م ا ازاماتتاردىڭ نازارىن ۆاليۋتالىق وپەراتسيالاردى جۇزەگە اسىرۋ كەزىندە ساقتىق شارالارىن ساقتاۋدىڭ ماڭىزدىلىعىنا اۋدارادى.

جەلىدە ازاماتتار شىنايى اقشانى جالعان نەمەسە سۋۆەنيرلىك اقشامەن شاتاستىراتىن بەينەلەر تاراتىلادى.

بۇل بەينەروليكتەر ادامدار ءتيىستى نازار اۋدارماي، شىنايى اقشانى جالعان نەمەسە سۋۆەنيرلىك اقشادان اجىراتا المايتىنىن جانە زاڭسىز وپەراتسيالارعا قاتىسۋ سياقتى جاعىمسىز سالدارعا اكەپ سوعاتىنىن كورسەتەدى.

- جالعان اقشا جاساۋشىلاردىڭ قۇربانى بولىپ قالماۋ جانە قىلمىستىق قۋدالاۋعا تۇسپەۋ ءۇشىن، بوتەن ادامدارمەن اقشا الماستىرىپ، ۆاليۋتا ايىرباستاۋ بويىنشا قولايلى كۋرس ۇسىنسا دا دەلدالدارمەن مامىلە جاساماعانىڭىز دۇرىس.

ساق جانە اباي بولىڭىزدار! ەگەر جالعان نەمەسە كۇماندى بانكنوتالاردى تاپساڭىز ونى ساتۋعا تىرىسپاڭىز. دەرەۋ قما نەمەسە تۇرعىلىقتى جەرىڭىز بويىنشا قۇقىق قورعاۋ ورگاندارىنا حابارلاسىپ، قاجەتتى تەكسەرۋلەردى جۇرگىزگەنىڭىز ءجون - دەپ ءمالىم ەتتى قارجى مونيتورينگى اگەنتتىگىنىڭ باسپا ءسوز قىزمەتى.

وسىعان دەيىن پاۆلوداردا 12600 دوللار كولەمىندەگى جالعان اقشانى ساۋدالاعان ادام سوتتالعانى تۋرالى جازدىق.