وتكەن جىلى 428,7 ميلليارد تەڭگە مولشەرىندە ۇرلانعان اكتيۆتەر مەملەكەتكە قايتارىلدى - باس پروكۋراتۋرا
استانا. KAZINFORM - بۇل تۋرالى بۇگىن باس پروكۋراتۋرانىڭ كەڭەيتىلگەن القا وتىرىسىندا ءمالىم بولدى.

باس پروكۋراتۋرانىڭ باسپا ءسوز قىزمەتىنىڭ مالىمەتتەرىنە قاراعاندا، القا وتىرىسندا باس پروكۋراتۋرانىڭ 2024-جىلى اتقارعان جۇمىستارى قورىتىندىلاندى.
جيىندا وتكەن جىلى اتقارىلعان جۇمىستار تۋراليا بايانداعان باس پروكۋرور بەرىك اسىلوۆتىڭ ايتۋىنشا، وتكەن جىلى اكتيۆتەردى قايتارۋ جونىندەگى قۇقىقتىق تەتىكتەردى نىعايتۋ جۇمىستارى دا جالعاستىرىلدى.
وتكەن جىلى 428,7 ميلليارد تەڭگە مولشەرىندە ۇرلانعان اكتيۆتەر قايتارىلدى. زاڭ سۋبەكتىلەرىمەن كەلىسىمدەر بويىنشا 48 ميلليارد تەڭگەدەن استام سوماعا 15 الەۋمەتتىك جانە ينۆەستيتسيالىق جوبا ىسكە قوسىلدى.
حالىقارالىق تاجىريبەنى ەسكەرە وتىرىپ، سوت تارتىبىمەن تۇسىنىكسىز شىققان اكتيۆتەردى مەملەكەت كىرىسىنە اينالدىرۋ پراكتيكاسى ەنگىزىلدى.
- قازىرگى تاڭدا ناتيجە بار ەكەنىن ايتا كەتۋ ءجون بولادى (10 ميلليون دوللارعا تالاپ قاناعاتتاندىرىلدى، سوما وتەلدى). سونىمەن قاتار، مۇلىكتى ەرىكتى تۇردە كەرى قايتارۋ بولىگىندە سۋبەكتىلەرمەن جۇمىس جۇرگىزىلۋدە. ەلدەگى كريمينوگەندىك جاعداي تۇراقتى باقىلاۋدا. قىلمىستىق قۇقىق بۇزۋشىلىقتار سانى ازايىپ كەلەدى (140 تان 132 مىڭعا دەيىن؛ -%5,3) - دەدى باس پروكۋرور.
وسىعان دەيىن انتيكور ەكى جىلدا 1,1 تريلليون تەڭگەنىڭ زاڭسىز اكتيۆتەرى قايتارىلعانى تۋرالى حابارلاعان بولاتىن.