وتباسىنىڭ ءال-اۋقات ساناتتارىنىڭ ەنگىزىلۋى: بانكتەر نەسيە بەرۋدەن باس تارتۋى مۇمكىن بە
استانا. KAZINFORM - وتباسىنىڭ ءال-اۋقاتى ساناتتارىنىڭ ەنگىزىلۋى نەسيە بەرۋگە قانشالىقتى اسەر ەتۋى مۇمكىن. بۇل سۇراققا ۇلتتىق بانك ءتوراعاسى تيمۋر سۇلەيمەنوۆ جاۋاپ بەردى.
ونىڭ ايتۋىنشا، قازاقستاننىڭ قارجى سەكتورى سيفرلىق تەحنولوگيالار مەن دەرەكقورلاردى ينتەگراتسيالاۋدى بۇرىننان قولدانىپ كەلەدى.
- بۇل جاعداي ۇلتتىق قارجى ينفراقۇرىلىمىنىڭ وپەراتورلارى رەتىندە بىزگە دە جانە كوممەرتسيالىق بانكتەرگە دە قاتىستى. مەملەكەتتىك كرەديتتىك بيۋرو مەن ءبىرىنشى كرەديتتىك بيۋرو ءارتۇرلى دەرەكقورلارمەن، سونىڭ ىشىندە اكتيۆتەر، جەكە تابىس جانە باسقا دا مالىمەتتەردى قامتيتىن دەرەكقورلارمەن ينتەگراتسيا ورناتۋعا مۇمكىندىك بەرەدى. نەسيە الۋعا ءوتىنىش بەرگەن كەزدە، ءسىز بانككە ءوزىڭىزدىڭ كرەديتتىك تاريحىڭىزبەن تانىسۋعا رۇقسات بەرەتىن كەلىسىمگە قول قوياسىز. وسىلايشا، بانك ءسىزدى مۇلدەم جاڭا كليەنت رەتىندە ەمەس، كەرىسىنشە، تابىسىڭىز، زەينەتاقى جارنالارىڭىز، اكتيۆتەرىڭىز جانە باسقا دا قاجەتتى دەرەكتەرىڭىز تۋرالى اقپاراتى بار ادام رەتىندە قاراستىرا الادى»، - دەپ ءتۇسىندىردى ت. سۇلەيمەنوۆ ۇلتتىق بانكتە وتكەن باسپا ءسوز ءماسليحاتىندا.
ۇ ب باسشىسى بانكتەردەگى مۇنداي پروتسەستەر بۇرىننان سيفرلاندىرىلعانىن، بۇل قارجى ينستيتۋتتارىنا نەسيە بەرۋ كەزىندە تاۋەكەلدەردى باعالاۋعا مۇمكىندىك بەرىپ وتىرعانىن اتاپ ءوتتى.
- بانكتەردە بۇل تەتىكتەر الدەقاشان سيفرلاندىرىلعان. ناتيجەسىندە، ولار ءارقايسىمىزعا قاتىستى تاۋەكەلدى انىق كورىپ وتىر. مۇنداي مۇمكىندىك ولاردا بۇرىننان بار. سوندىقتان، نەسيە الۋ بويىنشا قانداي دا ءبىر قوسىمشا تاۋەكەلدى كورىپ تۇرعان جوقپىن. ءبىز قارجى جۇيەسىن ايتارلىقتاي ءتيىمدى تۇردە سيفرلاندىرىپ ۇلگەردىك، - دەدى ۇلتتىق بانك ءتوراعاسى.
تيمۋر سۇلەيمەنوۆ بانكتەر ءۇشىن وتباسىنىڭ ءال-اۋقات دەڭگەيى بويىنشا دەرەكتەر ماڭىزدى ەمەس ەكەنىن، ويتكەنى ولار وزدەرىنىڭ اناعۇرلىم جەتىلدىرىلگەن سكورينگتىك مودەلدەرىن قولداناتىنىن اتاپ ءوتتى.
ءاربىر بانك قارىز الۋشىلاردى باعالاۋ ءتاسىلىن ءوزىنىڭ باسىم نەسيەلەۋ باعىتتارىنا (مىسالى، تۇتىنۋشىلىق نەسيەلەر، اۆتونەسيەلەر نەمەسە بيزنەسكە بەرىلەتىن نەسيەلەر) قاراي دەربەس ايقىندايدى. سوندىقتان كليەنتتەرگە قويىلاتىن تالاپتار ءارتۇرلى بولۋى مۇمكىن.
ايتا كەتەيىك، قازاقستاندا 2027-جىلعى 1-قاڭتاردان باستاپ اتاۋلى الەۋمەتتىك قولداۋدىڭ جاڭا جۇيەسى تولىق كولەمدە ىسكە قوسىلادى.
قازاقستاندا 212 مىڭعا جۋىق ءۇي شارۋاشىلىعى الەۋمەتتىك وسال ساناتقا جاتادى. بۇل ەلدەگى بارلىق ءۇي شارۋاشىلىعىنىڭ شامامەن 3 پايىزى جانە الەۋمەتتىك باعالاۋدىڭ ە ساناتىنا جاتادى. ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ مۇنداي وتباسىلاردى انىقتاپ، ولارعا مەملەكەتتىك كومەك ءبىرىنشى كەزەكتە كورسەتىلەتىنىن ايتتى.
