وتباسىنداعى زورلىق-زومبىلىقتى ءۇي ىشىنەن سىرتقا شىعارماۋ ادەتكە اينالعان - ءى ءى م
استانا. KAZINFORM - وتكەن جىلى ىشكى ىستەر ورگاندارىنا وتباسىندا زورلىق- زومبىلىق كورسەتۋ بويىنشا 99026 فاكتى تىركەلگەن. سوڭعى ۋاقىتتا تۇرمىستىق زورلىق-زومبىلىق پروبلەمالارى قوعامدا ءجيى قوزعالىپ، جابىرلەنۋشىلەر كورگەن ازابىن اشىق ايتا باستادى. وتباسىنىڭ شىرقىن بۇزىپ، جۇدىرىعىن الا جۇگىرەتىندەرمەن كۇرەستىڭ قالاي ءجۇرىپ جاتقانىن ءبىلۋ ماقساتىندا Kazinform اگەنتتىگى ىشكى ىستەر مينيسترلىگىنە رەسمي ساۋال جولداعان ەدى.

ۇرىپ-سوعۋ، كۇش كورسەتۋ فاكتىلەرى 102 كانالىنا كەلىپ تۇسكەن قوڭىراۋلار، ارىزدار مەن شاعىمدار، حابارلامالار، ب ا ق جانە الەۋمەتتىك جەلىلەرگە جاريالانعان جازبالار ارقىلى انىقتالادى. سونداي-اق، پوليتسەيلەردىڭ وزدەرى دە بۇزاقىلاردى تاۋىپ جاتادى.
«زورلىق-زومبىلىقتىڭ ءمان-جايى جابىرلەنۋشىدەن، كۋاگەرلەردەن جانە قۇقىق بۇزۋشىنىڭ وزىنەن جاۋاپ الۋ ارقىلى ناقتىلانادى. سونىمەن قاتار بەينەكامەرالاردان الىنعان ايعاقتار، اقپارات كوزدەرىندە جاريالانعان ۆيدەولار، وقيعا ورنىنا كەلگەن پوليتسيانىڭ تەكسەرۋ نەگىزىندە تولتىرىلعان حاتتاما جانە باسقا دا ايعاقتارمەن دالەلدەنەدى»، - دەلىنگەن رەسمي اقپاراتتا.
ال جابىرلەنۋشىنىڭ دەنساۋلىعىنا جەڭىل دارەجەدەگى زيان كەلگەن جاعدايدا ونى قالاي دالەلدەيدى؟
«سوت-مەديتسينالىق ساراپتاماسىنىڭ قورىتىندىسى نەگىزىندە، ەگەر دەنساۋلىعىنا كوزگە كورىنەتىن زيان كەلمەي، الايدا قۇقىق بۇزۋشى ونى ۇرىپ-سوقسا سوت- مەديتسينالىق ساراپتاسىنىڭ قورىتىندىسىنسىز، جابىرلەنۋشى جاۋاپ بەرۋ بارىسىندا وزىنە فيزيكالىق اۋىرسىنۋ كەلتىرىلگەنى جونىندە ايعاقتار ۇسىنۋى جانە ونى كۋاگەرلەردىڭ جاۋابىمەن نەمەسە باسقا دا (فوتو، بەينە، اۋديوجازبا) ايعاقتارمەن دالەلدەنەدى»، - دەيدى ۆەدومستۆودان.
ايتا كەتسەك، ىشكى ىستەر ورگاندارى بىلتىردان باستاپ تۇرمىستىق زورلىق-زومبىلىق فاكتىلەرى بويىنشا ءىس قوزعاۋدا ءوتىنىش بەرۋ سيپاتىنان انىقتاۋ فورماتىنا كوشكەن.
«قوعامدا تۇرمىستىق زورلىق-زومبىلىقتى ءۇي ىشىنەن سىرتقا شىعارماۋ ادەتكە اينالعان. الايدا ءبىز قوعامدىق ۇيىمدارمەن بىرلەسىپ، ب ا ق جانە الەۋمەتتىك جەلىلەر ارقىلى زورلىق-زومبىلىق فاكتىلەرى تۋرالى پوليتسياعا دەرەۋ حابارلاۋ قاجەتتىگى تۋرالى ماقساتتى جۇمىس جۇرگىزىپ جاتىرمىز»، - دەگەن جاۋاپ الدىق ءى ءى م- دەن.
اۆتور
داۋلەت ىزتىلەۋ