وتباسىندا جانجال شىعارۋشىلارعا ەلەكتروندى باقىلاۋ ەنگىزىلمەك
بىشكەك. KAZINFORM - قىرعىزستاندا تۇرمىستىق زورلىق- زومبىلىقپەن كۇرەس شارالارىن كۇشەيتۋ ماقساتىندا ءتارتىپ بۇزۋشىلارعا ەلەكتروندى بىلەزىكتەر قولدانۋدى ەنگىزۋ ۇسىنىلدى. ءتيىستى زاڭ جوباسىن ادىلەت مينيسترلىگى تانىستىردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ۆەدومستۆونىڭ مالىمەتىنشە، قۇجات تۇرمىستىق زورلىق- زومبىلىق، ونى جاساۋشىلاردىڭ مىنەز- قۇلقىنا ەلەكتروندى مونيتورينگ ەنگىزۋدى، سونداي-اق جابىرلەنۋشىلەرمەن قارىم- قاتىناسقا تىيىم سالۋ جانە اتا- انا قۇقىقتارىن شەكتەۋ سياقتى شەكتەۋ شارالارىنىڭ تىزبەسىن كەڭەيتۋدى قامتيدى.
زاڭ جوباسىنا سايكەس، ۋاقىتشا قورعاۋ نۇسقامالارى مەن شەكتەۋلەردىڭ ساقتالۋىن قاشىقتىقتان باقىلاۋ ءۇشىن تەحنيكالىق قۇرالداردى پايدالانا وتىرىپ، شارالار ەنگىزىلدى. سوت ورنالاسقان جەردى 3 ايعا دەيىن باقىلاۋدى جانە بەلگىلەنگەن تىيىمداردى ساقتاۋدى تاعايىنداي الادى.
قورعاۋ نۇسقاماسىنىڭ، تۇزەتۋ باعدارلاماسىنىڭ نەمەسە ەلەكتروندىق باقىلاۋداعى تىيىمداردىڭ تالاپتارىن ورىنداماۋ قاماۋعا الۋ مەرزىمىن ۇزارتۋمەن قوسا، قاتاڭ جازاعا اكەپ سوعادى.
ۋاقىتشا قورعاۋ نۇسقاماسىنىڭ، تىيىم سالۋلار مەن شەكتەۋلەردىڭ تالاپتارىن ورىنداماعانى ءۇشىن قاماۋعا الۋدىڭ ەڭ ۇزاق مەرزىمىن بۇزۋشىلارعا ىقپال ەتۋدى كۇشەيتۋ ءۇشىن 14 تاۋلىككە دەيىن ارتتىرۋ ۇسىنىلىپ وتىر.
ءتارتىپ بۇزۋشىلارعا ەلەكتروندىق مونيتورينگ پەن باقىلاۋدى جۇزەگە اسىرۋ ۋاكىلەتتى ورگانعا جۇكتەلەدى. تەحنيكالىق قۇرالداردى پايدالانۋ ءتارتىبى مەن شارتتارىن مينيسترلەر كابينەتى ايقىندايدى.
