وتباسىمىزدا امەريكالىقتان گورى قازاق كوپ: امەريكالىق ايەل قازاقتىڭ ءتورت بالاسىن اسىراپ العان

 ۆيردجينيا شتاتىندا كەترين ليەۆيت ەسىمدى جالعىزباستى ايەل قازاقستاننان ءتورت بالانى اسىراپ العان. بۇگىندە ءۇش قىز جانە ءبىر ۇل بالا امەريكالىق ايەلمەن بىرگە تۇرادى. بۇل تۋرالى Jibek Joly ارناسىنىڭ «شەتەلدەگى قازاق بالالارى» باعدارلاماسى حابارلايدى. 

امەريكالىق ايەل بالا اسىراۋدى كوپ جىلدار بويى ارمان ەتكەن. ول وزگە بالالاردى باۋىرىنا باسۋدى ءوزىنىڭ ومىرلىك ميسسسياسى دەپ سانايدى.

«بالا كۇنىمدە دە انامنان ءسابي اسىراپ الايىقشى دەپ سۇرايتىنمىن. انامنىڭ التى بالاسى بولعاندىقتان، «وسكەندە، ءوزىڭ اسىراپ الارسىڭ» دەيتىن. سول سانامدا قالىپ قويدى. كەيىن دايىندالىپ، قۇجاتتاردى رەتتەپ، سول قادامعا باردىم. ول كەزدە قازاقستان شەتەلدىكتەرگە قازاقستاندىق بالالاردى اسىراۋعا ەندى رۇقسات بەرگەن ەدى. مەنىڭ قازاقستان ەلشىلىگىندە جۇمىس ىستەيتىن دوستارىم بولدى. سول ءۇشىن وسى ەلدىڭ بالالارىن العىم كەلدى»، - دەيدى ول.

كەترين ورال قالاسىنا بارىپ، جاننانى جولىقتىرعان. سوزىنشە، ونى 1 جاس 10 ايىندا باۋىرىنا باسقان. ول جانناعا تەز ۇيرەنىسكەنىن، ونى قاتتى جاقسى كورىپ كەتكەنىن ايتادى. سودان سوڭ جاننا جالعىز قازاق بولماسىن دەپ ونىڭ وتانداسىن اسىراپ الۋعا شەشىم قابىلدايدى.

وسىلايشا الماتىدان جەتى ايلىق اناردى اسىراپ الدى. ونىڭ امەريكالىق ەسىمى دەيزي. انار قازىر 21 دە. سودان كەيىن كوپ ۇزاماي الماتىدان قارلىعاشتى الىپ كەتەدى. ول دا جەتى ايلىق بولعان. قارلىعاشتى جاقىندارى قازىر كارلي دەيدى. قارلىعاش 18 جاسقا تولدى.

«ءۇش قىزبەن تۇرىپ جاتقاندا تۇرمىس قۇردىم. سول كەزدە كۇيەۋىم تاعى ءبىر بالا اسىراپ العىسى كەلدى. تاعى دا قازاقستانعا باردىق»، - دەيدى قازاق قىزداردىڭ وگەي اناسى.

كۇيەۋى ەكەۋى قاراعاندىدان سەگىز ايلىق الىشەردى اسىراپ العان. قازىرگى ەسىمى - ماكس، 13 جاستا.

«وتباسىمىزدا امەريكالىقتان گورى قازاق كوپ. بالالارىمنىڭ ءبارى قازاق ەكەندەرىن بىلەدى، ءوز ۇلتىن ماقتان تۇتادى. ءبىز ولاردان وتكەنى تۋرالى جاسىرمايمىز»، - دەيدى ول.

الىشەردى اسىراپ العاننان كەيىن كەترين لەۆيت جۇبايىمەن اجىراسىپ كەتىپتى. سەبەبىن ايتۋدان تارتىندى.

ءتورت قازاق بالانىڭ اناسى مانۋالدى تەراپەۆت دارىگەر بولىپ جۇمس ىستەيدى، ءوزىنىڭ جەكە كلينيكاسى بار. جاننا دا ونىڭ جولىن قۋىپ، فلوريدادا مانۋالدى تەراپيا ماماندىعىندا وقىپ جاتىر. سونداي-اق ۆيردجينيادا بيولوگيا ماماندىعىن ءبىتىرىپ، يسپان ءتىلىنىڭ مامانى اتانعان.

ال ەكىنشى قىز انار ۆيردجينيا پوليتەحنيكالىق ۋنيۆەرسيتەتىندە ورمان شارۋاشىلىعى فاكۋلتەتىندە وقيدى. قارلىعاش بولسا، دجەيموس مەديسون ۋنيۆەرسيتەتىنىڭ ستۋدەنتى، ول حالىقارالىق ساۋدا- ساتتىق، كولىك ساۋداسىنا قىزىعاتىنىن ايتتى. قارلىعاش يسپانشا جاقسى بىلەدى. ايتۋىنشا، قازاق ءتىلىن بىلمەسە دە، يسپان تىلىنە جۇيرىك.

ءۇيدىڭ كەنجەسى الىشەردىڭ سپورتقا جاقىن ەكەنى بايقالادى. ول اتاقتى تەننيسشى بولىپ، قازاقستان قۇراماسى قاتارىندا ەلىمىزدىڭ اتىنان جارىسقا قاتىسۋدى ارماندايتىنىن ايتتى.