وتباسى بانكى دەپوزيتتەرىندە زەينەتاقى جيناقتارىن ساقتاۋ مەرزىمى ۇزارتىلدى

استانا. KAZINFORM - ەلىمىزدە ءبىرجولعى زەينەتاقى تولەمدەرىن پايدالانۋ قاعيدالارىنا وزگەرىستەر ەنگىزىلدى.

ونەركاسىپ جانە قۇرىلىس مينيسترلىگى 13-شىلدەدە قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترىنىڭ 2021 -جىلعى 21-قاڭتارداعى №24-بۇيرىعىمەن بەكىتىلگەن ءبىرجولعى زەينەتاقى تولەمدەرىن تۇرعىن-ءۇي جاعدايلارىن جاقسارتۋ ءۇشىن پايدالانۋ قاعيدالارىن وزگەرتتى.

ەنگىزىلگەن وزگەرىستەرگە سايكەس، تۇرعىن ءۇي ساتىپ الۋ ماقساتىندا بۇرىن ءبىرجولعى زەينەتاقى تولەمدەرىمەن تولىقتىرىلعان «وتباسى بانك» ا ق دەپوزيتتەرىندە قاراجاتتى جيناقتاۋ مەرزىمى 3 جىلدان 6 جىلعا دەيىن ۇزارتىلدى.

بۇدان بولەك، دەپوزيتتى ەرلى-زايىپتىلارعا جانە جاقىن تۋىستارىنا بەرۋ كوزدەلگەن، ءبىراق سالىمدى ءۇشىنشى تۇلعاعا، ياعني ودان ءارى بەرۋگە جول بەرىلمەيدى. قۇجات رەسمي جاريالانعاننان كەيىن 10 كۇن وتكەن سوڭ كۇشىنە ەنەدى.

بۇيرىقتىڭ تولىق ماتىنىمەن سىلتەمە ارقىلى تانىسۋعا بولادى.

ەسكە سالا كەتەيىك، قازاقستاندا زەينەتاقى جيناعىن ەرتە شەشىپ الۋ توقتاتىلۋى مۇمكىن ەكەندىگى تۋرالى حابارلاعان ەدىك.

ەڭبەك جانە حالىقتى الەۋمەتتىك قولداۋ ءمينيسترى سۆەتلانا جاقىپوۆانىڭ ايتۋىنشا، كەيبىر ساراپشىلار زەينەتاقى قورىنداعى جيناقتى ەرتە شەشىپ الۋدى توقتاتۋدى ۇسىنعان.

اۆتور
داۋلەت ىزتىلەۋ