«وتباسى بانكتى» ەكىنشى دەڭگەيدەگى بانكتەر جۇيەسىندە قالدىرعان دۇرىس - ءلاززات يبراگيموۆا
«وتباسى بانك» ءتوراعاسى ءلاززات يبراگيموۆا تۇرعىن ءۇي جيناق بانكىن ەكىنشى دەڭگەيلى جۇيەدەن شىعارۋ شاراسى نەگە كەشەۋىلدەپ جاتقانىن ءتۇسىندىردى، دەپ حابارلايدى قازاقپارات ءتىلشىسى.

«2021-2022-جىلدارى «وتباسى بانك» ەكىنشى دەڭگەيدەگى بانكتەر جۇيەسىنەن شىعارىلىپ، باسپانا نارىعىن دامىتۋ ينستيتۋتىنا اينالاتىنى ايتىلعان بولاتىن. ول يدەيادان اينىپ قالدىڭىزدار ما؟»، - دەپ سۇرادى ب ا ق وكىلى ماجىلىستەگى وتىرىستان كەيىن.
بانك ءتوراعاسى ول جوبا قازىر ءماجىلىستىڭ قاراۋىندا ەكەنىن ايتادى.
«بۇل زاڭ جوباسى (قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن وزگەرتۋ باعىتىندا وزگەرتۋلەر مەن تۇزەتۋلەر ەنگىزۋ تۋرالى» - رەد.) قازىر ماجىلىستە جاتىر. ءبىراق قازىر ونىڭ اكتيۆ كولەمى جانە جەكە كاپيتالىنىڭ كولەمى بويىنشا ەلدەگى ءتورتىنشى بانككە اينالعانىن ەسكەرسەك، شەشىمدى جان-جاقتى تارازىلاپ بارىپ قابىلدايمىز. بانك قارجى نارىعىن رەتتەۋ جانە دامىتۋ اگەنتتىگىنىڭ قۇزىرىندا قالسىن، دەگەندى جاقتاۋشىلار بار. بۇل بانكتىڭ قىزمەتىن كوبىرەك باقىلاۋعا مۇمكىندىك بەرەدى. ونداي باقىلاۋ كەرەك تە. ەكىنشى تاراپتان بانك حالىقتىڭ الەۋمەتتىك از قامتىلعان ساناتىنا كوبىرەك باعدار ۇستاسا دەگەن ۇسىنىس بار. ونداي جاعدايدا بيۋجەتتەن كوبىرەك اقشا ءبولىنىپ، قىزمەتىندە ەركىندىك پايدا بولار ەدى. بورىشكەرلەردىڭ تولەم قابىلەتىن باعالاۋ، كەپىل قويۋ ساياساتى سونشالىق قاتاڭ بولماۋشى ەدى. سوندىقتان بۇل ماسەلە ءالى تالقىلاۋ ساتىسىندا»، - دەدى بانك باسشىسى.
ءلاززات يبراگيموۆا ءتىپتى «وتباسى بانك» ەكىنشى دەڭگەيدەگى بانكتەر جۇيەسىنەن شىعارىلعان كۇننىڭ وزىندە سالىمشىلاردىڭ دەپوزيتتەرىنە مەملەكەت كەپىلدىك بەرەتىنىن اتاپ ءوتتى.
«بانكتىڭ اكسيونەرى «بايتەرەك» ۇلتتىق باسقارۋ حولدينگى بولسا، «بايتەرەكتىڭ» اكسيونەرى ۇكىمەت. سوندا ۇكىمەتتىك دەڭگەيدەگى كەپىلدىك بار دەگەن ءسوز. سوندىقتان بۇل ماسەلەدە تۇبەگەيلى شەشىم قابىلدانبايدى دەپ ويلايمىن. ويتكەنى بۇل جاڭا مودەل. ال جاڭا مودەل ءارقاشان اۋىر ەنەدى. سوندىقتان ەسكى مودەلدە قالعان دۇرىس»، - دەيدى ءلاززات يبراگيموۆا.