وتباسى بانك شىلدەدە العاشقى وبليگاتسيالارىن شىعارادى

استانا. KAZINFORM - وتباسى بانك بيىل ءوز وبليگاتسيالارىن شىعارۋ جانە ورنالاستىرۋ ارقىلى 300 ميلليارد تەڭگە تارتۋدى جوسپارلاپ وتىر. بۇل اقشا قازاقستاندىقتارعا «ناۋرىز» باعدارلاماسى بويىنشا كرەديت بەرۋگە جۇمسالادى.

شىلدە ايىندا 100 ميلليارد كولەمىندەگى العاشقى وبليگاتسيالار شىعارىلىپ، «قازاقستان قور بيرجاسىنا» ورنالاستىرىلادى. ءبىر وبليگاتسيانىڭ نومينالدى قۇنى 1000 تەڭگەنى قۇرايدى. بۇل رەتتە قاراجات تارتىلاتىن مولشەرلەمە تەك العاشقى ساۋدا-ساتتىق قورىتىندىلارى بويىنشا ايقىندالادى.

KASE الاڭىندا وتكىزىلەتىن وتباسى بانك ەميتەنتى كۇنىندە باسقارما ءتورايىمى ءلاززات يبراگيموۆا وبليگاتسيالار نە ءۇشىن شىعارىلاتىنىن ءتۇسىندىردى.

«جيىرما جىل بۇرىن قۇرىلعان بانك ميسسياسى - وتباسىلاردىڭ باسپانالى بولۋىن قامتاماسىز ەتىپ، ولاردىڭ ءال-اۋقاتىن جاقسارتۋ. وتباسى بانك سەنىمدى جانە تۇراقتى دامىپ كەلە جاتقان جيناقتاۋ جانە قارجىلاندىرۋ جۇيەسى بولىپ ەسەپتەلەدى. قازاقستانداعى ەكىنشى دەڭگەيدەگى بانكتەر اراسىندا يپوتەكا بويىنشا وتباسى بانكتىڭ ۇلەسى 54 پايىزدى قۇرايدى. قازىر وتباسى بانك اكتيۆتەرى مەن مەنشىكتى كاپيتالى بويىنشا ەلدەگى ەكىنشى دەڭگەيدەگى بانكتەر اراسىندا ءتورتىنشى ورىندا تۇر. كۇن سايىن قازاقستاندىقتارعا 400 دەن استام كرەديت بەرەمىز»، - دەدى باسقارما ءتورايىمى.

وتباسى بانكتە 2,7 ميلليون قازاقستاندىق دەپوزيتكە اقشا سالادى. بيىلدىڭ وزىندە بانك ارقىلى 28896 ادام باسپانالى بولدى. ءلاززات يبراگيموۆا وتباسى بانكتىڭ يپوتەكالىق باعدارلامالارىن تانىستىرىپ، سونىڭ ىشىندە «ناۋرىز» باعدارلاماسىنىڭ شارتتارىنا توقتالا كەتتى.

«ناۋرىز» باعدارلاماسى - ماڭىزدى الەۋمەتتىك جوبا. باعدارلامانىڭ ىسكە قوسىلاتىنى جونىندە بيىل قازاقستان پرەزيدەنتى قاسىم-جومارت توقايەۆ ۇلتتىق قۇرىلتايدا ايتقان بولاتىن. 28-ماۋسىمدا باعدارلاماعا قاتىسۋعا ءوتىنىم قابىلداۋ اياقتالدى. جالپى 38841 ءوتىنىم ءساتتى تۇردە قابىلداندى. استانا مەن الماتىدا قارىزدىڭ جوعارعى سوماسى - 36 ميلليون تەڭگە، قالعان وڭىرلەردە - 30 ميلليون تەڭگە. پايىزدىق مولشەرلەمە - 7-9 پايىز، ال باستاپقى جارنا - 20 پايىز. باعدارلاما جۇمىس ىستەيتىن جاستارعا، جاس وتباسىلارعا، وتباسى بانك سالىمشىلارىنا، مونوقالالار، اۋدان ورتالىقتارى مەن ەلدى مەكەندەر تۇرعىندارىنا ارنالعان. ءوتىنىم بەرۋشىلەردىڭ 62 پايىزى - 35 جاسقا دەيىنگى جاستار. ەندى ۇپايلار ەسەپتەلىپ، وسى اپتادا بانكتىڭ رەسمي سايتىندا باسپانالى بولاتىن قاتىسۋشىلاردىڭ ءتىزىمى جاريالانادى»، - دەدى باسقارما ءتورايىمى ءلاززات يبراگيموۆا.

«ناۋرىز» باعدارلاماسى 8 جىلعا جوسپارلانعان. وسى ۋاقىت ىشىندە 68 مىڭعا جۋىق قازاقستاندىق وتباسى باسپانالى بولادى. وتباسى بانك «ناۋرىز» باعدارلاماسىنا قاتىسۋشىلارعا كرەديت بەرۋ ءۇشىن وبليگاتسيالار شىعارۋ ارقىلى قاراجات تارتۋدى كوزدەپ وتىر. ولاردىڭ قۇنى بازالىق مولشەرلەمە دەڭگەيىن ەسكەرە وتىرىپ، ورنالاستىرۋ كۇنىنە قاراي ايقىندالادى جانە 5 جىل ىشىندە تۇراقتى بولادى.

«ءبىز ۇلتتىق بانكتىڭ ءنورماتيۆىن ورىندايمىز. بارلىق وپەراتسيانى تەك ۇلتتىق ۆاليۋتامىز - تەڭگەمەن جاسايمىز. دەپوزيتتە دە، كرەديتتە دە بەكىتىلگەن ناقتى مولشەرلەمە بار. سوندىقتان قاتەر جوق. ينۆەستيتسيالىق ساياساتقا سايكەس ءبىز تەك بورىشتىق باعالى قاعازدارعا ينۆەستيتسيا جاساي الامىز. وتباسى بانكتىڭ قارجى اگەنتى دەگەن مارتەبەسى بولادى. وبليگاتسياعا الەۋمەتتىك مارتەبە بەرىلەدى»، - دەدى ءلاززات يبراگيموۆا.

وبليگاتسيالاردى ينۆەستورلاردىڭ شەكتەۋسىز شەڭبەرى اراسىندا ورنالاستىرۋ جوسپارلانىپ وتىر. بۇل ەكىنشى دەڭگەيدەگى بانكتەر، ساقتاندىرۋ كومپانيالارى جانە ءتىپتى جەكە تۇلعالار بولۋى مۇمكىن. ياعني، قازىردىڭ وزىندە وتباسى بانكتە دەپوزيتتەرى بار نەمەسە سالىمشى بولۋدى جوسپارلاپ وتىرعان قازاقستاندىقتار ءوز قاراجاتتارىن بانك وبليگاتسيالارىنا دا ينۆەستيتسيالاي الادى.

شىعارىلعان وبليگاتسيالار الەۋمەتتىك باعالى قاعازدار مارتەبەسىنە يە بولادى. بۇل - بانكتىڭ اينىماستىعىنىڭ جانە ونىڭ ESG قاعيدالارى بويىنشا دامۋىنىڭ كورسەتكىشى. وبليگاتسيا ۇستاۋشىلار ءۇشىن بۇل فاكت قازاقستان ازاماتتارىنىڭ باسپانالى بولۋىن قامتاماسىز ەتۋ جونىندەگى مەملەكەتتىڭ الەۋمەتتىك ماڭىزدى مىندەتىن شەشۋگە جاردەمدەسۋ جوسپارىنداعى ارتىقشىلىقتاردىڭ ءبىرى بولادى.

الەۋەتتى ينۆەستورلار ءۇشىن وتباسى بانك سەنىمدى ەميتەنت. بۇگىندە ول ەكىنشى دەڭگەيدەگى بانكتەر اراسىنداعى ەڭ جوعارى رەيتينگتەرگە، ەلدىك دەڭگەيدەگى رەيتينگكە (BBB) يە. بانك نەسيە پورتفەلىنىڭ ەڭ جاقسى ساپاسىنا يە، بۇل %0,1 مولشەرىندەگى NPL ءدىڭ تومەن دەڭگەيىمەن راستالادى. بانك سەكتورىنداعى NPL ءدىڭ ورتاشا ءمانى %3,12 ەكەنىن ەسكەرسەك، بۇل وتە جاقسى كورسەتكىش.

«ناۋرىز» باعدارلاماسى بويىنشا ازاماتتارعا كرەديت بەرۋ ءۇشىن بارلىعى 1,7 تريلليون تەڭگەگە وبليگاتسيا شىعارۋ جوسپارلانىپ وتىر. ءبىرىنشى جىلى ءۇش رەتتەن 300 ميلليارد تەڭگە مولشەرىندە شىعارىلسا، كەيىنگى جىلدارى 200 ميلليارد تەڭگەدەن شىعارىلادى. تارتىلعان قاراجات نارىقتىق جاعدايلار بويىنشا قارىزعا الىناتىندىقتان، مەملەكەت وتباسى بانك شىعارعان وبليگاتسيالار بويىنشا سىياقى مولشەرلەمەسىن سۋبسيديالايدى دەپ بولجانىپ وتىر.

ايتا كەتسەك، قازاقستاندا حالىق سانى ارتقان سايىن باسپاناعا سۇرانىس وتە جوعارى. 2023-جىلدىڭ قورىتىندىسى بويىنشا جان باسىنا شاققاندا تۇرعىن-جاي كولەمى 23,9 شارشى مەتردى قۇرادى. ب ۇ ۇ ستاندارتى بويىنشا بۇل كورسەتكىش 30 شارشى مەترگە تەڭ. وعان جەتۋ ءۇشىن حالىقتىڭ باسپانالى بولۋىنا مۇمكىندىك بەرەتىن مەملەكەتتىك باعدارلامالار جۇزەگە اسىرىلىپ جاتىر. ال وتباسى بانك قازاقستاندا تۇرعىن ءۇي قۇرىلىس جيناق جۇيەسىن ىسكە اسىراتىن جالعىز بانك بولىپ وتىر.