وتباسى بانك ازيا دامۋ بانكىمەن ءوزارا تۇسىنىستىك تۋرالى مەموراندۋمعا قول قويدى
استانا. KAZINFORM - بۇگىن ەلوردادا وتكەن جاھاندىق ينۆەستيتسيالار بويىنشا VII قازاقستاندىق دوڭگەلەك ۇستەل وتىرىسى (KGIR-2024) بارىسىندا «وتباسى بانك» ا ق مەن ازيا دامۋ بانكى اراسىنداعى ەلىمىزدە ينكليۋزيۆتى جانە جاسىل تۇرعىن ۇيلەردى قارجىلاندىرۋدى ىلگەرىلەتۋ جوباسى بويىنشا ءوزارا تۇسىنىستىك تۋرالى مەموراندۋمعا قول قويىلدى.
«بۇگىن ازيا دامۋ بانكىمەن ورتاق مەموراندۋمعا قول قويىلدى. باعدارلاما 2025-جىلدىڭ ەكىنشى جارتىسىندا ىسكە قوسىلادى، قازىر بارلىق شارت راسىمدەلىپ جاتىر. ازيا دامۋ بانكى ەكى باعىتتى ماقۇلداپ وتىر، ءبىرىنشىسى - جاسىل يپوتەكا. بىزدە قازاقستاندىق جاسىل قۇرىلىس كەڭەسىمەن بىرلەسىپ جۇزەگە اسىرىلىپ جاتقان پيلوتتىق جوبا بار. بۇل كوممەرتسيالىق بىرلەستىك ەمەس، قوعامدىق بىرلەستىك، ولار ءبىزدىڭ قۇرىلىس كومپانيالارىمىز سالىپ جاتقان تۇرعىن ۇيلەردىڭ ەنەرگيا تيىمدىلىگىنە سەرتيفيكاتتاۋ جۇرگىزەدى. ءاربىر تۇرعىن ءۇي كەشەنىنە بەلگىلى ءبىر باعالاۋ بەرىلەدى. ول كومپانيالاردىڭ سەرتيفيكاتتاۋ دەڭگەيىنە بايلانىستى التىن، كۇمىس جانە قولا بولىپ بولىنەدى»، - دەدى «وتباسى بانك» ا ق باسقارما ءتوراعاسى ءلاززات يبراگيموۆا ەلوردادا وتكەن جاھاندىق ينۆەستيتسيالار بويىنشا VII قازاقستاندىق دوڭگەلەك ۇستەل بارىسىندا.
بانك ءتوراعاسىنىڭ ايتۋىنشا، بۇگىندە ەلىمىزدە «جاسىل يپوتەكا» جوعارى سۇرانىسقا يە.
«جىلدىق سىياقىسى %12,5 (ج ت س م %13,3 باستاپ %18,1 دەيىن) جانە %20 باستاپقى جارنامەن سالىمشىلار ەنەرگيانى ۇنەمدەيتىن تۇرعىن ءۇيدى ساتىپ الا الادى. يپوتەكانىڭ بۇل ءتۇرى ۇلكەن سۇرانىسقا يە. بيىل پيلوتتىق تۇردە جوبانى ءوز قاراجاتىمىزعا باستادىق، ازيا دامۋ بانكى اتالمىش باعدارلامامەن تانىسقان سوڭ، ءبىزدى قولداپ وتىر. وسىلايشا، قازاقستاندىق جاسىل قۇرىلىس كەڭەسى جانە قۇرىلىسشىلار وداعىمەن كەڭەسە كەلە ەنەرگيانى ءتيىمدى پايدالاناتىن تۇرعىن ءۇي تۋرالى ويلانۋىمىز كەرەك دەگەن قورىتىندىعا كەلدىك. ويتكەنى، كوممۋنالدىق قىزمەت تاريفىمەن قاتار باسپانا باعاسى دا وسە تۇسەدى. سوندىقتان قازىر سالىنىپ جاتقان تۇرعىن ءۇيدىڭ ەنەرگيانى ۇنەمدەۋى، جىلۋ وقشاۋلاۋ جۇيەسى دەڭگەيىنىڭ جوعارى بولۋى ماڭىزدى، اسىرەسە بۇل ماسەلە ەلىمىزدىڭ سولتۇستىك وڭىرلەرىنە قاتىستى. بۇل تۇرعىدا ازيا دامۋ بانكى بىزگە تەحنيكالىق تۇرعىدان قولداۋ كورسەتەدى»، - دەيدى ول.
ودان بولەك، ازيا دامۋ بانكى قولداپ وتىرعان وتباسى بانكىنىڭ ەكىنشى جوباسى گەندەرلىك (ينكليۋزيۆتى) تۇرعىن ءۇي يپوتەكاسى.
«وزدەرىڭىز بىلەتىندەي، بىزدە «ۇماي» ايەلدەرگە ارنالعان يپوتەكاسى بار. وتكەن جىلى ازيا دامۋ بانكى بىزگە وسى جوبا ءۇشىن «گەندەرلىك چەمپيون» مارتەبەسىن بەردى. ەكونوميكالىق ىلگەرىلەۋدە ايەلدىڭ ءوز باسپاناسى بولۋى كوپشىلىكتىڭ قىزىعۋشىلىعىن ارتتىردى. وسىلايشا، ايەلدەر اجىراسقان جاعدايدا نەمەسە تۇرمىستىق زورلىق-زومبىلىققا تاپ بولعان جاعدايدا ءوز اتىندا ءۇيى بولسا، دالادا قالمايدى. انالاردى قورعاۋ ارقىلى ءبىز بالالاردى دا قورعايمىز. «ۇماي» يپوتەكاسى بويىنشا نەسيە مولشەرلەمەسى بازالىق مولشەرلەمەگە بايلانىستى، ويتكەنى اقشا ازيا دامۋ بانكىنىڭ جەرگىلىكتى نارىعى ارقىلى تارتىلادى. ءبىز كرەديت بويىنشا مولشەرلەمە 12 پايىزدان جوعارى بولماۋى ءۇشىن بازالىق مولشەرلەمەنىڭ تومەندەۋىنەن ۇمىتتەنەمىز»، - دەدى ءلاززات يبراگيموۆا.
ايتا كەتسەك، قازاقستاندىقتار ەكى باعىت بويىنشا باستاپقى، قايتالاما، سونداي-اق سالىنىپ جاتقان تۇرعىن ۇيلەردى ساتىپ الۋعا جانە جوندەۋگە زاەم الا الادى دەپ جوسپارلانىپ وتىر.
