وتباسى بانك باسشىسى بانك كليەنتتەرىن الاڭداتاتىن باستى ماسەلەلەردىڭ ءبىرىن ايتتى
استانا. KAZINFORM - قازاقستاندا تۇرعىن ءۇي باعاسى مەن حالىق تابىسىنىڭ ءوسۋ قارقىنىن سايكەستەندىرۋ ءۇشىن يپوتەكانى ۇزاق مەرزىمدى قارجىلاندىرۋدىڭ جاڭا تەتىكتەرى قاراستىرىلىپ جاتىر. بۇل تۋرالى «وتباسى بانك» ا ق باسقارما ءتورايىمى ءلاززات يبراگيموۆا استانادا وتكەن ساراپشىلىق تالقىلاۋدا ايتتى.
ونىڭ سوزىنشە، بۇگىندە بانك كليەنتتەرىن الاڭداتاتىن باستى ماسەلەلەردىڭ ءبىرى - باسپانا قۇنىنىڭ قىمباتتاۋى مەن وتباسى تابىسىنىڭ اراسىنداعى الشاقتىق.
- كليەنتتەرىمىز ەڭ ءجيى قوياتىن سۇراق - قازاقستاندىق وتباسىلاردىڭ تابىسى مەن تۇرعىن ءۇي باعاسىنىڭ ءوسۋ قارقىنى قانشالىقتى سايكەس كەلەتىنى. ءبىزدىڭ مىندەتىمىز - وسى ەكەۋىنىڭ اراسىنداعى تەپە-تەڭدىكتى ساقتاۋ. سوندىقتان قۇرىلىس كومپانيالارىنىڭ قاۋىمداستىعىمەن جانە قازاقستان قۇرىلىسشىلار وداعىمەن كەزدەسىپ، 2027-2028 -جىلدارعا ارنالعان ۇزاق مەرزىمدى قارجىلاندىرۋ تەتىكتەرىن تالقىلاۋدى جوسپارلاپ وتىرمىز، - دەدى ءلاززات يبراگيموۆا.
بانك باسشىسى جاڭا تەتىكتەردى ازىرلەۋ كەزىندە تۇرعىنداردىڭ باسپاناعا قارجى جيناۋ مۇمكىندىگى مەن بولاشاقتاعى پاتەر قۇنىن الدىن الا ەسكەرۋ ماڭىزدى ەكەنىن اتاپ ءوتتى.
ايتا كەتەيىك، بۇعان دەيىن قازاقستاندا ەسكى ۇيلەردى جاڭارتۋ باعدارلاماسى اياسىندا تۇرعىنداردىڭ مۇددەسىن قورعاۋعا ارنالعان جاڭا كەپىلدىك تەتىگى ىسكە قوسىلاتىنى حابارلاندى.
