وتباسى بانك «ناۋرىز» باعدارلاماسىندا وڭىرلەرگە جەكە ليميت ەنگىزۋى مۇمكىن

ونىڭ سوزىنشە، سوڭعى ءۇش جىلدا باعدارلاماعا قاتىسۋشىلاردىڭ باسىم بولىگى استانا، الماتى جانە شىمكەنت قالالارىنان باسپانا الۋدى تاڭداعان. بۇل وزگە وڭىرلەردە تۇرعىن ءۇي نارىعىن دامىتۋ ءۇشىن قوسىمشا قولداۋ شارالارى قاجەت ەكەنىن كورسەتەدى.

- «ناۋرىز» باعدارلاماسى ارقىلى جىل سايىن 8-10 مىڭ جاس وتباسى باسپانالى بولادى. سوڭعى ءۇش جىلدا قاتىسۋشىلاردىڭ 60 پايىزى، كەيدە ءتىپتى 70 پايىزى استانا، الماتى جانە شىمكەنت قالالارىن تاڭدايدى. بۇل شامامەن 5-6 مىڭ وتباسى. ال جەزقازعان سياقتى قالالار ءۇشىن 100 نەمەسە 200 پاتەرگە جەكە ليميت قاراستىرۋعا بولار ەدى، - دەدى ءلاززات يبراگيموۆا.

بانك باسشىسى جاقىندا ۇلىتاۋ وبلىسىنا جاساعان ساپارىندا جەزقازعانداعى تۇرعىن ءۇي قورىنىڭ ەسكىرگەنىنە نازار اۋدارعانىن جەتكىزدى. ونىڭ پىكىرىنشە، مۇنداي قالالاردا جاڭا تۇرعىن ۇيلەر سالۋ حالىقتىڭ تۇرمىس ساپاسىن جاقسارتۋعا مۇمكىندىك بەرەدى.

- جەزقازعاندا ماسەلە تەك قالاعا جاڭا تۇرعىنداردىڭ كەلۋىندە ەمەس. ەڭ الدىمەن، وسى جەردە جۇمىس ىستەيتىن ادامداردىڭ ءومىر ءسۇرۋ ساپاسىن ارتتىرىپ، ولارعا تۇرعىن ءۇيدىڭ جاڭا ستاندارتىن ۇسىنۋ ماڭىزدى. سوندىقتان مۇنداي وڭىرلەرگە ارنايى قولداۋ شارالارى قاجەت، - دەدى ول.

ءلاززات يبراگيموۆا وڭىرلەرگە جەكە ليميت ءبولۋ تۇرعىنداردىڭ ءوز قالاسىنان باسپانا الۋىنا مۇمكىندىك بەرىپ، جەرگىلىكتى تۇرعىن ءۇي نارىعىنداعى سۇرانىستى ارتتىرۋعا ىقپال ەتەتىنىن اتاپ ءوتتى.

ايتا كەتەيىك، بۇعان دەيىن تۇرعىن ءۇيدى قارجىلاندىرۋدىڭ جاڭا جولدارى قاراستىرىلىپ جاتقانى حابارلاندى.