وتاندىق تاسىمالداۋشىلارعا 58 ەلدىڭ نارىعىنا شىعۋعا جول اشىلادى - قۇرىلتاي زاڭ قابىلدادى
استانا. KAZINFORM - بۇگىن قۇرىلتاي وتىرىسىندا «جۇكتەردى حالىقارالىق جولمەن تاسىمالداۋ شارتى تۋرالى كونۆەنتسيانى راتيفيكاتسيالاۋ تۋرالى» زاڭ جوباسى ءبىرىنشى وقىلىمدا ماقۇلدانىپ، ەكىنشى وقىلىمدا قابىلداندى.
قۇجاتتى تانىستىرعان كولىك ءمينيسترىنىڭ مىندەتىن اتقارۋشى ماقسات قالياقپاروۆتىڭ ايتۋىنشا، كونۆەنتسيا حالىقارالىق اۆتوتاسىمالدار سالاسىنداعى نەگىزگى قۇجات سانالادى. وعان 58 مەملەكەت كىرەدى، ونىڭ ىشىندە ت م د- نىڭ بارلىق ەلى دە بار.
- بۇل قۇجات حالىقارالىق اۆتوموبيل جۇك جەتكىزۋ ءتارتىبىن بەلگىلەيدى. اتاپ ايتقاندا شارت جاساۋ، راسىمدەۋ جانە تاسىمالداۋشىنىڭ جاۋاپكەرشىلىگى تۋرالى ورتاق تالاپتاردى قامتيدى. اتالعان كونۆەنتسيا قاتىسۋشى مەملەكەتتەردىڭ تاسىمالداۋشىلارىنا ءبىرىڭعاي تالاپتاردى قولدانۋ، حالىقارالىق كولىك قىزمەتتەرى نارىعىندا اشىق باسەكەلەستىك قالىپتاستىرۋعا ىقپال ەتەدى. سونىمەن قاتار تاسىمالداۋ پروتسەسىنە قاتىسۋشىلاردىڭ قۇقىقتارىن قورعاۋعا جانە حالىقارالىق جۇك جەتكىزۋدى جەڭىلدەتەدى، - دەدى ول.
ونىڭ سوزىنە قاراعاندا، كونۆەنتسيانى قولدانۋ ەكسپورتتىق-يمپورتتىق جۇك اينالىمىنىڭ دامۋىنا ىقپال ەتىپ، شەتەلدىك مەملەكەتتەر قازاقستاندىق كومپانيالارعا سەنىمىن ارتتىرادى. سوندىقتان وسى قۇجاتتى قابىلداۋ وتاندىق كولىك كومپانيالارىنىڭ حالىقارالىق نارىقتارعا شىعۋ جانە جۇك جەتكىزۋ گەوگرافياسىن كەڭەيتۋ ءۇشىن قولايلى جاعداي جاسايدى.
- مەملەكەت باسشىسى ايتقانداي، اۆتوكولىكپەن جۇك تاسىمالدايتىن وتاندىق كاسىپكەرلەرىمىزگە جاردەم كورسەتۋ قاجەت. وسىعان وراي، ۇسىنىلعان كونۆەنتسيا كورسەتىلگەن ماقساتتارعا قول جەتكىزۋگە مۇمكىندىك بەرەدى. اتالعان زاڭ جوباسى رەسپۋبليكالىق بيۋدجەتتەن قوسىمشا قاراجات ءبولۋدى تالاپ ەتپەيدى، - دەدى ماقسات قالياقپاروۆ.
جۇك تاسىمالداۋشىلارعا ارنايى باعدارلاما ازىرلەنەدى
وسىدان كەيىن دەپۋتاتتار بايانداماشىعا سۇراقتارىن قويدى. ماسەلەن، جاناربەك ءاشىمجان قازاقستاننىڭ حالىقارالىق اۆتوموبيلمەن جۇك تاسىمالداۋ كەلىسىمشارتى تۋرالى كونۆەنتسياعا قوسىلۋى ناتيجەسىندە ەلدە حالىقارالىق اۆتوموبيل تاسىمالدارىنىڭ قۇقىقتىق نەگىزى قالاناتىنىن اتاپ ءوتتى.
- وسى كونۆەنتسياعا قاتىسۋشى ەلدەر اراسىنداعى ترانزيتتىك- كولىكتىك قاتىناستار ودان ءارى داميدى. تاسىمالداۋشىلاردىڭ جاۋاپكەرشىلىگى ستاندارتتالادى، كەدەندىك راسىمدەر وڭتايلاندىرىلادى، سونداي-اق ەۋرازيالىق لوگيستيكالىق جۇيەگە ينتەگراتسيالانۋ قامتاماسىز ەتىلەدى. وسىعان بايلانىستى مەنىڭ سۇراعىم: اتالعان كونۆەنتسيا قازاقستاندىق تاسىمالداۋشىلارعا قانداي قوسىمشا مۇمكىندىكتەر بەرەدى؟ - دەپ سۇرادى ول بايانداماشىدان.
ساۋالعا جاۋاپ بەرگەن مينيستر مىندەتىن اتقارۋشى ەلىمىز كونۆەنتسياعا قوسىلعاننان كەيىن 58 ەلدە قولدانىلاتىن ءبىرىڭعاي ەرەجەلەرمەن جۇمىس ىستەيتىنىن ايتتى.
- دەمەك، بۇل وتاندىق تاسىمالداۋشىلارعا وڭ اسەرىن تيگىزەدى. ويتكەنى ءبىرىڭعاي ەرەجەلەرمەن جۇرەدى، ءبىرىڭعاي جۇيە بولادى، - دەدى ول.
ال دەپۋتات كونستانتين اۆەرشين حالىقارالىق نارىقتا وتاندىق تاسىمالداۋشىلاردىڭ باسەكەگە قابىلەتتىلىگىن ارتتىرۋ اشىق ءارى بىرىزدەندىرىلگەن قۇقىقتىق جاعداي قالىپتاستىرماي مۇمكىن ەمەستىگىنە نازار اۋدارتتى. وسىعان وراي ول كونۆەنتسياعا قوسىلۋ جانە قۇقىقتىق وزگەرىستەر ەنگىزۋ قازاقستاندىق تاسىمالداۋشىلاردىڭ باسەكەگە قابىلەتتىلىگىن ارتتىرۋعا قانشالىقتى جەتكىلىكتى بولاتىنىنا الاڭداۋشىلىق تانىتتى.
ماقسات قالياقپاروۆتىڭ پايىمىنشا، ەلىمىزدىڭ كونۆەنتسياعا قوسىلۋى وتاندىق تاسىمالداۋشىلاردىڭ باسەكەگە قابىلەتتىلىگىن ارتتىرۋداعى ماڭىزدى قادام بولماق.
- قازىر ءبىز ولارعا ارناپ وسى كونۆەنتسيانىڭ ۇسىنىمدارى مەن ۇسىنىستارى اياسىندا ارنايى باعدارلاما ازىرلەپ جاتىرمىز. جالپى، بۇل كونۆەنتسيا حالىقارالىق تاسىمالداردى جۇزەگە اسىراتىن قازاقستاندىق تاسىمالداۋشىلاردىڭ باسەكەگە قابىلەتتىلىگىن ءسوزسىز ارتتىرادى دەپ ەسەپتەيمىن، - دەدى مينيستر مىندەتىن اتقارۋشى.
قازاقستاننىڭ ترانزيتتىك الەۋەتىن ارتتىرۋعا جاڭا مۇمكىندىك تۋادى
زاڭ جوباسىن تالقىلاۋ بارىسىندا دەپۋتات تۇراربەك تىلەمىسوۆ حالىقارالىق اۆتوموبيل تاسىمالدارىنىڭ قۇقىقتىق الاڭىن جەتىلدىرۋ ماسەلەسى ەلىمىزدىڭ ەكونوميكالىق ەگەمەندىگى مەن ەكسپورتتىق الەۋەتى ءۇشىن اسا ماڭىزدى ەكەنىنە توقتالدى.
- كونۆەنتسيا - بۇل جاي عانا كولىك جۇك قوزعايتىن ستاندارتتارى ەمەس، بۇل وركەنيەتتى لوگيستيكا نارىعىنڭ ىرگەتاسى. نەلىكتەن بۇل باعىتتا قولداۋ مەن دامىتۋ تۇبەگەيلى ماڭىزدى؟ بىرىنشىدەن - بيزنەستىڭ قۇقىقتىق قورعالۋى. ءبىزدىڭ وتاندىق تاسىمالداۋشىلار كۇن سايىن حالىقارالىق باعىتتارعا شىعادى. ءبىرىڭعاي جانە تۇسىنىكتى ەرەجەلەر بولماعان جاعدايدا، ولار كوبىنەسە جۇكتەردىڭ ءبۇلىنۋى، جوعالۋى نەمەسە جولدا كەشىگۋ كەزىندە تۋىندايتىن داۋلاردا قورعانسىز قالادى. وسى كونۆەنتسيا جاۋاپكەرشىلىك ليميتتەرىن جانە شاعىمداردى رەتتەۋدىڭ اشىق تەتىكتەرىن ناقتى بەكىتىپ، قازاقستاندىق بيزنەستىڭ مۇددەلەرىن قورعايدى،- دەدى ول.
دەپۋتات زاڭ جوباسى ەكىنشىدەن ەلىمىزدىڭ ترانزيتتىك الەۋەتىن ارتتىراتىنىن ايتتى.
- قازاقستان گەوگرافيالىق تۇرعىدان ازيا مەن ەۋروپا اراسىنداعى باستى كوپىر بولۋ ءۇشىن جارالعان. شەتەلدىك ينۆەستورلار مەن ءىرى لوگيستيكالىق وپەراتورلار جالپىعا بىردەي تانىلعان حالىقارالىق كونۆەنتسيالاردى قولدانا الاتىن دالىزدەرگە عانا سەنىم ارتادى. بۇل كولىك ينفراقۇرىلىمىنا ينۆەستيتسيالاردى تارتۋعا تىكەلەي اسەر ەتەدى. وسى باستامانى قابىلداۋ جانە بەلسەندى تۇردە قولداۋ مەملەكەتىمىزدىڭ سەنىمدى ءارى بولجامدى ساۋدا سەرىكتەس رەتىندە ۇستانىمىن نىعايتا تۇسەدى، - دەدى تۇراربەك تىلەمىسوۆ.
وسىدان كەيىن وڭىرلىك جانە ينفراقۇرىلىمدىق دامۋ كوميتەتىنىڭ ۇسىنىسىمەن زاڭ جوباسى ءبىرىنشى وقىلىمدا ماقۇلدانىپ، ەكىنشى وقىلىمدا قابىلداندى. قۇجات كوميتەت وتىرىستارىندا دەپۋتاتتارمەن جانە مۇددەلى مەملەكەتتىك ورگاندار وكىلدەرىمەن جان-جاقتى قارالعان ءارى ۇسىنىستار مەن ەسكەرتپەلەر كەلىپ تۇسپەگەن. زاڭ جوباسى كولىك-لوگيستيكالىق پروتسەستىڭ نەگىزگى قاتىسۋشىلارى - جونەلتۋشىلەر، الۋشىلار مەن تاسىمالداۋشىلاردىڭ ءوزارا ءىس-قيمىلىن رەتتەۋگە باعىتتالعان. سونىمەن قاتار حالىقارالىق اۆتوموبيل جۇك تاسىمالىنىڭ جۇزەگە اسۋى كەزىندە ولاردىڭ اراسىندا تۋىندايتىن قۇقىقتىق قاتىناستاردى رەتتەيدى.
مارلان جيەمباي
