وتار ەلدى مەكەنىندەگى توبەلەس: ەكى اسكەري قىزمەتشى ۋاقىتشا ۇستاۋ يزولياتورىندا
الەۋمەتتىك جەلىدە جامبىل وبلىسىنداعى وتار ەلدى مەكەنىندە بولعان توبەلەستىڭ ۆيدەوسى تارادى. ۆيدەودا توبەلەستە اسكەري قىزمەتشىلەردىڭ دە بار ەكەندىگى ايتىلعان، دەپ حابارلايدى Kazinform.
ق ر قورعانىس مينيسترلىگىنىڭ باسپا ءسوز قىزمەتى وقيعاعا بايلانىستى پىكىر ءبىلدىردى. وندا «1- قاڭتاردا جامبىل وبلىسى پوليتسيا دەپارتامەنتى مەن قورداي اۋدانى پوليتسيا ءبولىمى قىزمەتكەرلەرى ءبىر توپ ادامنىڭ ۇستىنەن بۇزاقىلىق جاسادى دەگەن فاكتىمەن قىلمىستىق ءىس قوزعالدى. اتالعان وقيعا ناتيجەسىندە ەكى ازامات دەنە جاراقاتىن العان.
قىلمىستىق ءىستى تەرگەۋ بارىسىندا گۆاردەيسك گارنيزونىندا كەلىسىمشارت بويىنشا اسكەري قىزمەتشىلەردىڭ وقيعاعا قاتىسى بارى انىقتالدى.
«ق ر ق ى ج ك- ءنىڭ 128، 131-باپتارىنا سايكەس، وسى قىلمىستى جاسادى دەگەن كۇدىكپەن التى ادام ۇستالدى، ونىڭ ىشىندە 2 اسكەري قىزمەتشى قازىرگى ۋاقىتتا ۋاقىتشا ۇستاۋ يزولياتورىنا قاماۋعا الىندى. وزگە اقپارات تەرگەۋ مۇددەسى ءۇشىن جاريا ەتىلمەيدى»، - دەلىنگەن حابارلامادا.
ق ر ق ك «وڭتۇستىك» وڭىرلىك قولباسشىلىعى باسپا ءسوز قىزمەتى «توبەلەس اسكەري قىزمەتشىلەر مەن قاراپايىم ازاماتتار اراسىندا بولدى»، «اسكەريلەر جەرگىلىكتى تۇرعىندى سوققىعا جىقتى» دەگەن اقپاراتتاردىڭ شىندىققا جاناسپايتىنىن حابارلادى.
توبەلەسكەندەردىڭ ىشىندە تەك ەكەۋى اسكەري قىزمەتشى جانە وقيعا جۇمىستان تىس ۋاقىتتا بولعان.
