وتاندىق تاۋارلاردى ىلگەرىلەتۋ ءۇشىن 5 ترانسشەكارالىق حاب سالىنادى

استانا. KAZINFORM - ينۆەستورلاردى تارتۋ ورتالىقتارىنا اينالاتىن 5 ترانسشەكارالىق حاب سالىنادى. بۇل تۋرالى ساۋدا جانە ينتەگراتسيا مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى ارمان شاققاليەۆ ايتتى.

- قازاقستاندىق تاۋارلاردىڭ ەكسپورتىن ىلگەرىلەتۋ ءۇشىن قاجەتتى ينفراقۇرىلىم سالىنىپ جاتىر. ينۆەستورلاردى تارتۋ ورتالىقتارىنا اينالاتىن جانە كورشى ەلدەرمەن شيكىزاتتىق ەمەس ەكسپورتتىڭ وسۋىنە مۇمكىندىك بەرەتىن 5 ترانسشەكارالىق حاب سالىناتىن بولادى. سىرتقى ينفراقۇرىلىمدى قالىپتاستىرۋ بويىنشا اۋقىمدى جۇمىس جۇرگىزىلدە. ەلشىلىكتەردىڭ قولداۋىمەن قىتايدا 2 سەرىكتەس كورمە الاڭدارى ىسكە قوسىلدى جانە ءۇرىمشى قالاسىندا ساۋدا وكىلدىگى اشىلدى. دۋبايدا «Qazaq Trade House» ساۋدا ءۇيى جۇمىسىن باستادى، - دەدى ۆەدومستۆو باسشىسى.

ءمينيستردىڭ اتاپ وتۋىنشە، بىرىككەن اراب امىرلىكتەرى، اۋعانستان، تاجىكستان، يتاليا، وزبەكستان، رەسەي جانە قىرعىزستاندى قوسا العاندا، نەگىزگى سەرىكتەس ەلدەردە 10 ساۋدا- ەكونوميكالىق ميسسيا ۇيىمداستىرىلدى.

- ەكسپورتتى ىلگەرىلەتۋدەگى ماڭىزدى قادام - ايماقتاندىرۋ قاعيداتى بويىنشا جاڭا ءتاسىلى ەنگىزىلدى. سونداي-اق، ۇرىمشىمەن ساۋدا 22 پايىزعا، سىچۋان پروۆينتسياسىنا ەكسپورت 49 پايىزعا جانە تسزيانسۋعا ەكسپورت ءتورت ەسە ءوستى. قازاقستاندىق كومپانيالاردىڭ ەڭ ءىرى جانە تانىمال كورمەلەرگە قاتىسۋى قامتاماسىز ەتىلدى، ولار: CIFTIS، CIIe، Digital Expo، ەۋرازيا ەكسپو. قازاقستاندىق تاۋارلاردى ۇلتتىق پاۆيلوندار ارقىلى jd.com ،Doiyin ،Alibaba حالىقارالىق ەلەكتروندىق الاڭداردا ىلگەرىلەتۋ بويىنشا جۇمىستار جۇرگىزىلىپ جاتىر، - دەدى ارمان شاققاليەۆ.

بۇعان دەيىن ارمان شاققاليەۆ ساۋدا مينيسترلىگىنىڭ باسىم مىندەتتەرىن اتاعانىن جازعان ەدىك.