وتاندىق تاۋار وندىرۋشىلەر قازاقستاندا شىعارىلعان تاۋارلار ءتىزىلىمىن ەنگىزۋگە قارسى
ساۋدا جانە ينتەگراتسيا مينيسترلىگى قازاقستاندا شىعارىلعان تاۋارلار ءتىزىلىمىن ەنگىزبەك. الايدا، بۇل ۇسىنىسقا ەلىمىزدەگى قاۋىمداستىقتار مەن وتاندىق تاۋار وندىرۋشىلەر قارسى شىعىپ وتىر، دەپ حابارلايدى قازاقپارات ءتىلشىسى.

«بيىل ۇكىمەت قازاقستاندا شىعارىلعان تاۋارلار ءتىزىلىمىن قۇرۋ ماسەلەسىن كوتەردى. بۇل ءتىزىلىم يندۋستريالىق سەرتيفيكات پەن س ت- KZ سەرتيفيكاتىن الماستىرۋدى كوزدەيدى. وكىنىشكە قاراي، بيزنەس-قوعامداستىقتىڭ وسى ءتىزىلىمدى قۇرۋدىڭ ورىنسىزدىعى تۋرالى بارلىق دالەلى مەن نەگىزدەمەلەرى تىڭدالمادى»، - دەدى «اتامەكەن» ۇ ك پ تاۋاردىڭ شىعۋ تەگىن سەرتيفيكاتتاۋ دەپارتامەنتىنىڭ باسقارۋشى ديرەكتورى سامات سادىقوۆ.
قازىرگى كەزدە ۇلتتىق كاسىپكەرلەر پالاتاسى وتاندىق تاۋار وندىرۋشىلەردى قولداۋ ماقساتىندا رەتتەلەتىن ساتىپ الۋدىڭ نەگىزگى شەڭبەرىندە قولدانىلاتىن قۇجاتتاردىڭ ەكى ءتۇرىن بەرۋ جونىندەگى فۋنكتسيانى جۇزەگە اسىرادى. مۇنداي قۇجاتتار - «س ت- KZ» فورماسىنداعى سەرتيفيكات پەن يندۋستريالىق سەرتيفيكات. ال مەملەكەتتىك ورگان ۇسىنعان تىزىلىمدە مەحانيزم جەتىلمەگەن. ويتكەنى وندا تىزىلىمگە وتۋگە رۇقسات بەرەتىن ءبىر عانا كريتەري - تەحنولوگيالىق وپەراتسيالاردى ورىنداۋ عانا قاراستىرىلعان. الايدا بارلىق تاۋارعا دەرلىك تەحنولوگيالىق وپەراتسيالاردى جازىپ شىعۋ مۇمكىن ەمەس.
مىسالى، رەسەيدە وسىعان ۇقساس ءتىزىلىم 2015-جىلدان قولدانىلىپ كەلەدى، ونىڭ ۇستىنە ونەركاسىپ تە اناعۇرلىم دامىعان. تىزىلىمگە 11,5 مىڭ كودتىڭ 2 مىڭ كودى ەنگىزىلگەن.
«اتامەكەن» وكىلىنىڭ اتاپ وتۋىنشە، مەملەكەتتىك ورگاندار ۇسىنعان ءتىزىمدى جاڭا مەحانيزم دەپ ايتۋعا بولمايدى. ونىڭ س ت- KZ بەرۋ جونىندەگى قولدانىستاعى مەحانيزمنەن ايىرماشىلىعى، تەك ءبىر كريتەرييدى قولدانىلادى - بۇل تەحنولوگيالىق وپەراتسيالار. ال س ت- KZ سەرتيفيكاتىندا 3 كريتەري قاراستىرىلعان.
سونىمەن قاتار، مەملەكەتتىك ورگان ۇسىنعان قازاقستاندا شىعارىلعان تاۋارلار تىزىلىمىندە ءوندىرىستى لوكاليزاتسيالاۋ دەڭگەيى مەن كاسىپورىنداردىڭ وندىرىستىك قۋاتى كورسەتىلمەيدى.
مەملەكەتتىك ورگاندار ۇسىنعانى – س ت- KZ سەرتيفيكاتىن بەرۋگە قويىلاتىن تالاپتاردىڭ وزگەرۋى عانا. ول باسقا اتاۋعا يە بولادى، ءبىراق سونىمەن بىرگە جاڭا تالاپتارعا كوشۋ جانە جاڭا قۇجات الۋعا بايلانىستى زاڭدارعا وزگەرىس ەنگىزۋدى تالاپ ەتەدى، سونداي-اق بيزنەس ءۇشىن قارجىلىق جانە ۋاقىتتىق شىعىندارعا اكەپ سوعادى.
ق ر جيھاز جانە اعاش وڭدەۋ ونەركاسىبى قاۋىمداستىعىنىڭ پرەزيدەنتى قانات يبرايەۆ اتاپ وتۋىنشە، بۇگىنگى تاڭدا يندۋستريالىق سەرتيفيكات - بيزنەستىڭ نارىقتا باقىلاۋدى جۇزەگە اسىرۋعا جانە ناقتى ءوندىرىستى قولداۋ شەڭبەرىندە ويىننىڭ ناقتى ەرەجەلەرىن جاريالاۋعا مۇمكىندىگى بار قۇرالداردىڭ ءبىرى.
«مەملەكەتتىك ساتىپ الۋعا قاتىساتىن وندىرۋشىلەردىڭ ناقتى سەكتورى يندۋستريالىق سەرتيفيكاتتىڭ تيىمدىلىگىنە كوزى جەتتى. مىسال كەلتىرسەم، يندۋستريالىق سەرتيفيكات ەنگىزىلگەنگە دەيىن 2019-جىلى جيھاز سالاسى بويىنشا نەگىزگى كاپيتالعا سالىنعان ينۆەستيتسيالار شامامەن 1,7 ميلليارد تەڭگەنى قۇراسا، يندۋستريالىق سەرتيفيكات ەنگىزىلگەننەن كەيىن 21,1 پايىزعا ءوسىپ، 2,1 ميلليارد تەڭگەدەن استى»، - دەدى قانات يبرايەۆ.