وتاندىق ليزينگ نارىعىن دامىتۋدىڭ نەگىزگى باعىتتارى ايقىندالدى

استانا. KAZINFORM - قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانىڭ مالىمدەۋىنشە، ەلىمىزدە ليزينگ نارىعى رەتتەۋدى جانە نارىق قاتىسۋشىلارى تاپ بولاتىن پروبلەمالاردى انىقتاپ، ءتيىستى شەشىمدەردى قابىلداۋدى تالاپ ەتەدى.

- ليزينگتىك كومپانيالارمەن، سالالىق قاۋىمداستىقپەن بىرلەسىپ، سالانى دامىتۋعا ارنالعان شەشىمدەردى ازىرلەۋ جۇمىسىنا بەلسەندى قاتىسامىز دەپ ويلايمىن. ءبىز جۇمىستى جۇرگىزۋ قاجەت ءۇش نەگىزگى باعىتتى كورىپ وتىرمىز. ءبىرىنشى باعىت - جەكە ليزينگتىك كومپانيالاردىڭ مەملەكەتتىك قولداۋ باعدارلامالارىن ىسكە اسىرۋعا قاتىسۋىن كەڭەيتۋ. بۇعان دەيىن اتاپ وتكەنىمدەي، بۇگىندە ليزينگتىك قارجىلاندىرۋدىڭ %93 ىن دامۋ ينستيتۋتتارى قامتاماسىز ەتىپ وتىر. بۇل ونەركاسىپتى دامىتۋ قورى مەن قازاگروقارجى. ولار جەڭىلدەتىلگەن بيۋجەتتىك قارجىلاندىرۋ ەسەبىنەن قارجىلاندىرىلادى، - دەيدى م. ءابىلقاسىموۆا.

بۇگىندە ەلىمىزدە 2023-2029-جىلدارعا ارنالعان وڭدەۋشى ونەركاسىپتى دامىتۋ تۇجىرىمداماسى جانە 2021-2030-جىلدارعا ارنالعان اگروونەركاسىپ كەشەنىن دامىتۋ تۇجىرىمداماسى بار. اتالعان باعدارلامالار اياسىندا ليزينگتىك قارجىلاندىرۋ قاراستىرىلعان.

- بىرىنشىدەن، كاسىپكەرلەردى مەملەكەتتىك قولداۋ باعدارلامالارىنا جەكە ليزينگتىك كومپانيالاردى كەڭىنەن تارتۋ. بۇل قادام باسەكەلەستىك ورتانى قالىپتاستىرۋعا، كاسىپكەرلىك سۋبەكتىلەرى اراسىندا ليزينگتىك قىزمەتتى كەڭىنەن تاراتۋعا ىقپال ەتەدى دەپ سانايمىز. وسىلايشا، كاسىپكەرلەردى قولداۋ قۇرالدارىنا نارىقتىڭ بارلىق قاتىسۋشىنى تەڭدەي قامتۋ كوزدەلىپ وتىر. ەكىنشى ماڭىزدى باعىت - ليزينگتىك قىزمەتتى كەشەندى رەتتەۋ مەن ستاتيستيكا جيناۋ ينفراقۇرىلىمىن دامىتۋ. ليزينگ نارىعىنا قاتىستى ەسەپتى جەتىلدىرۋ قاجەت. بىرىزدەندىرىلگەن ەسەپ قۇرالىن ەنگىزىپ، قۇرىلىمدىق اقپاراتتىق بازا قالىپتاستىرۋ قاجەت جانە قىزمەتتىڭ ءبىرىڭعاي ستاندارتتارىن ايقىنداعان ابزال. بۇل نارىقتىڭ اشىقتىعىن ارتتىرىپ، ساپالى تالداۋدى قامتاماسىز ەتۋگە جانە مەملەكەتتىك ساياساتتىڭ نەگىزدەلگەن شەشىمدەرىن قابىلداۋعا مۇمكىندىك بەرەدى، - دەيدى ول.

اگەنتتىك باسشىسىنىڭ ايتۋىنشا، ليزينگتىك كومپانيالاردىڭ سانى مەن ءرولىنىڭ ارتۋىن ەسكەرە وتىرىپ، كورپوراتيۆتىك باسقارۋ ستاندارتتارىن ەنگىزۋگە، اقپاراتتىڭ اشىقتىعىنا جانە كليەنتتەرمەن ءوزارا ءىس- قيمىلعا ەرەكشە كوڭىل ءبولۋ قاجەت. اتالعان شارالار ينۆەستورلاردىڭ ليزينگتىك كومپانيالارعا دەگەن سەنىمىن ارتتىرىپ، ليزينگ سالاسىندا زاماناۋي ءارى اشىق رەتتەۋ جۇيەسىن قالىپتاستىرۋعا سەپتىگىن تيگىزەدى.

- ءۇشىنشى باعىت - جەكە ليزينگتىك كومپانيالار ءۇشىن قارجىلاندىرۋ كوزدەرىن كەڭەيتۋ. بۇگىندە قور نارىعى قۇرالدارىن كاپيتال كوزى رەتىندە پايدالانۋ كەڭ تارالماعان، سەبەبى جەكە ليزينگ بەرۋشىلەردىڭ باسىم بولىگى - شاعىن جانە ورتا كومپانيالار. ءبىز كوبىنەسە ليزينگتىك كومپانيالار قارجىلاندىرۋدى ەكىنشى دەڭگەيلى بانكتەردەن نەسيە الۋ ارقىلى تارتاتىنىن كورىپ وتىرمىز. باستاپقىدا قارجىلاندىرۋ قۇنى جوعارى بولىپ قالىپتاسادى، بۇل ءوز كەزەگىندە ليزينگتىك وپەراتسيا بارىسىندا تۇپكىلىكتى قىزمەت الۋشىلارعا دا، ليزينگ الۋشىلارعا دا اسەر ەتەدى. وسىعان بايلانىستى باستى مىندەت - ليزينگتىك كومپانيالار ءۇشىن قارجىلاندىرۋ قۇنىن تومەندەتۋ. ليزينگ قۇرالى - وڭدەۋشى ونەركاسىپ كومپانيالارى ءۇشىن دە، جالپى بۇكىل ناقتى سەكتوردى جاڭعىرتۋ ءۇشىن دە اسا ءتيىمدى قۇرال. سەبەبى ول نەسيەگە قاراعاندا قولجەتىمدى، ۇزاق مەرزىمدى بولۋى ءتيىس، سونداي-اق شاعىن جانە ورتا بيزنەس ءۇشىن كەڭ اۋقىمدى جابدىق تۇرلەرىنە قول جەتكىزۋدى قامتاماسىز ەتۋگە مۇمكىندىك بەرەدى، - دەپ تولىقتىردى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى.

ايتا كەتەيىك، قازاقستاندا ليزينگ نارىعىنىڭ كولەمى 2,7 تريلليون تەڭگەگە جەتتى.

بۇعان دەيىن قازاقستاندىق كاسىپكەرلەرگە ليزينگ الۋدىڭ تيىمدىلىگى تۋرالى جازعان ەدىك.

بۇگىن ەلوردادا «قازليزينگ - 2025: ونەركاسىپ پەن كاسىپكەرلىكتى قارجىلاندىرۋ كوزى رەتىندە قازاقستاندا ليزينگتى دامىتۋ پەرسپەكتيۆالارى» اتتى العاش كونفەرەنسياسى ءوتىپ جاتىر.