وتاندىق جىلقى تۇقىمىن ساقتاۋ جانە كوبەيتۋگە 701 ميلليون تەڭگە بولىنەدى
استانا. KAZINFORM - سەنات «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءمىنىس جانە ءمىنىس- جەگىن جىلقىلاردىڭ وتاندىق تۇقىمدارىن ساقتاۋ جانە ءوسىمىن مولايتۋ ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭدى ماقۇلدادى.
«زاڭنىڭ نەگىزگى ماقساتى - وتاندىق جىلقى تۇقىمىنىڭ تەكتىك قورىن ساقتاۋ، سونداي-اق ونىڭ اسىل تۇقىمدىق قاسيەتتەرىن جاقسارتۋ، مال باسىن ۇلعايتۋ ءۇشىن سەلەكتسيالىق جانە اسىلداندىرۋ جۇمىسىن جۇرگىزۋ. وسى ماقساتتى ىسكە اسىرۋ ءۇشىن زاڭدا «اسىل تۇقىمدى جانۋار» جانە «تۇقىم ستاندارتى» ۇعىمدارىنا وزگەرىستەر ەنگىزىلەدى. بۇل رەتتە اسىل تۇقىمدى مالداردىڭ فەنوتيپتىك جانە ونىمدىلىك كورسەتكىشتەرمەن قاتار، جىلقىلاردىڭ جۇمىسقا قابىلەتتىلىگى، ەپتىلىگى، توزىمدىلىگى سياقتى قاسيەتتەرى تۇقىم ستاندارتىنا جاتقىزىلادى. اتالعان زاڭمەن «اسىل تۇقىمدى مال شارۋاشىلىعى تۋرالى» جانە «سەلەكتسيالىق جەتىستىكتەردى قورعاۋ تۋرالى» زاڭدارعا تۇزەتۋلەر ەنگىزىلەدى»، - دەدى سەناتور ەرنۇر ايتكەنوۆ.
ونىڭ اتاپ وتۋىنشە، زاڭنامالىق تۇزەتۋلەردە وتاندىق جىلقى تۇقىمىن ساقتاۋ جانە كوبەيتۋ ماقساتىندا كەلەسىدەي سۋبسيديالاۋ كوزدەلگەن:
- وتاندىق ءمىنىس-جەگىن جىلقىلارىن وسىرەتىن ورتالىقتارعا شەتەلدىك سەلەكتسيانىڭ سپورتتىق باعىتىنداعى اسىل تۇقىمدى ايعىرلارىن ساتىپ الۋعا؛
- اسىل تۇقىمدى انالىق مال باسىمەن سەلەكتسيالىق- اسىل تۇقىمدىق جۇمىس جۇرگىزۋگە؛
- ولاردى ۇستاۋ بويىنشا شىعىنداردى وتەۋگە.
«مەملەكەت تاراپىنان بولىنەتىن سۋبسيديانىڭ جالپى سوماسى - 701 ميلليون تەڭگە. بۇل قاراجات الداعى 5 جىلعا جىل سايىن 140 ميلليون تەڭگەدەن بەرىلەتىن بولادى. كورسەتىلەتىن مەملەكەتتىك قولداۋ شارالارى اسىل تۇقىمدى جىلقىلاردىڭ گەندىك قورىن ساقتاۋعا، دامىتۋعا جانە قالپىنا كەلتىرۋگە، وتاندىق جىلقى شارۋاشىلىعىن جەتىلدىرۋگە ىقپال ەتەدى دەپ سەنەمىن. بۇل زاڭ ەلىمىزدە ۇلتتىق ات سپورتى تۇرلەرىن دامىتۋعا، قازاق حالقىنىڭ مادەنيەتىن، داستۇرلەرى مەن ءومىر سالتىن ناسيحاتتايتۋعا سەپتىگىن تيگىزەدى. زاڭدى قابىلداۋ وتاندىق اسىل تۇقىمدى جىلقىلاردى ءوسىرۋ ءۇشىن مەملەكەتتىك قولداۋدى الۋعا، ءمىنىس- جەگىن قازاقى جىلقىلاردىڭ سانىن كوبەيتۋگە جانە ولاردىڭ سپورتتىق قاسيەتتەرىن جاقسارتۋعا مۇمكىندىك بەرەدى»، - دەدى سەناتور.
