وتاندىق عىلىمنىڭ الدىندا ەل ەكونوميكاسىن دەكاربونيزاتسيالاۋ مىندەتى تۇر - پرەزيدەنت
استانا. KAZINFORM - وتاندىق عىلىمنىڭ الدىندا قازاقستان ەكونوميكاسىن دەكاربونيزاتسيالاۋعا بايلانىستى ماڭىزدى مىندەت تۇر.
بۇل تۋرالى پرەزيدەنت قاسىم-جومارت توقايەۆ عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ايتتى.
«وتاندىق عىلىمنىڭ الدىندا قازاقستان ەكونوميكاسىن دەكاربونيزاتسيالاۋعا بايلانىستى ماڭىزدى مىندەت تۇر. دامىعان ەلدەردىڭ كوبى جاڭارتىلاتىن ەنەرگيا كوزدەرىنە قاتىستى جوبالاردى بەلسەندى ىسكە اسىرۋدا. سونداي-اق ولار كومىرتەكسىز دامۋعا كوشىپ، جاڭا ەكونوميكالىق كلاستەرلەر قۇرۋ ءۇشىن قاجەتتى تەحنولوگيالىق الەۋەتكە يە. بۇل سالاداعى جاھاندىق ۇردىستەر كوشىنەن قالماۋ ءۇشىن بىزگە ءوز ەرەكشەلىكتەرىمىز ەسكەرىلگەن ءتول عىلىمي ازىرلەمەلەر قاجەت.
وسى رەتتە جەرىمىزدىڭ قازبا بايلىعى بۇرىنعىشا ەلىمىزدىڭ ەكونوميكالىق ءوسىمىنىڭ نەگىزى بولىپ قالا بەرەتىنىن ەستەن شىعارماعان ءجون. سوندىقتان تابيعي رەسۋرستاردى، سونىڭ ىشىندە كومىرسۋتەگىلەر مەن سيرەك كەزدەسەتىن مەتالداردى ءوندىرۋ سالاسىنا وزىق تەحنولوگيالاردى ەنگىزۋ كەرەك. ىزدەۋ-بارلاۋ جۇمىستارىنىڭ ناتيجەلى بولۋىنا ءمان بەرىپ، جاڭا كەن ورىندارىن اشۋ قاجەت. ول ءۇشىن گەولوگيا عىلىمىن ساپالى دامىتۋ ماڭىزدى. جالپى، بۇكىل وتاندىق عىلىمنىڭ الەۋەتى باسەكەلەستىك ارتىقشىلىقتارىمىزدى ءتيىمدى پايدالانۋعا جانە عىلىمدى قاجەت ەتەتىن جاڭا سەكتورلاردى كەڭىنەن يگەرۋگە باعىتتالۋعا ءتيىس».
