وتانداستاردىڭ قورجىنى: ىشىندە ۇلتتىق قولونەر بۇيىمدارى بار
«وتانداستار» قورىنىڭ قانداستارعا ارنالعان مازمۇندى جوبالارىنىڭ ءبىرى - «قورجىن».
قورجىندا قازاقى قۇندىلىقتارىمىزدى دارىپتەپ، ۇلتقا قىزمەت ەتىپ جۇرگەن شەتتەگى قازاق-مادەني ۇيىمدارعا ارنالعان ۇلتتىق اسپاپتار، ۇلتتىق ناقىشتاعى كيىمدەر، كىتاپ جانە باسقا دا بۇيىمدار بار، دەپ حابارلايدى Kazinform.
قور 2019 -جىلى شەتەلدەگى وتانداستارىمىزعا كومەك كورسەتۋ ماقساتىندا الەمنىڭ 21 ەلىندەگى قازاق مادەني-ىسكەرلىك ورتالىقتارىنا 87 «ءداستۇرلى قورجىن» جيىنتىعىن تابىستادى. قورجىن ىشىندە قازاقتىڭ ۇلتتىق كيىمى، دومبىرا، قۇراق كورپە جانە قازاق تۇرمىسىنا قاجەتتى قولونەردىڭ باسقا دا ەلەمەنتتەرى قامتىلعان.
«2020-2021-جىلدارى شەتەلدەگى قازاق مادەني ورتالىقتارى مەن بىرلەستىكتەرىن ۇلتتىق كيىممەن، مۋزىكالىق اسپاپتارمەن جانە بۇيىمدارمەن قامتاماسىز ەتۋ جونىندەگى جوبا پاندەمياعا بايلانىستى ۋاقىتشا توقتاعان بولاتىن.
2022-2023-جىلدارى الەمنىڭ 17 ەلىندەگى 43 مادەني ورتالىققا قازاقستان رەسپۋبليكاسىنىڭ مەملەكەتتىك تۋى - 138 دانا، ۇلتتىق كيىم - 457 جيىنتىق جانە ۇلتتىق ساز اسپاپتارى - 178 دانا تابىس ەتىلدى»، - دەپ جازدى قور ۇجىمىنان.
«قورجىن» العان اعايىننىڭ ىشىنەن ر ف التاي رەسپۋبليكاسى قوساعاش اۋدانىنداعى «ءشۇيدىڭ نۇرى» گازەتىنىڭ باس رەداكتورى ارقالىق سولتانوۆ بىلاي دەيدى:
«سىزدەر ۇلتتىق اسپاپتار مەن كيىمدەردى تابىستاعان كەزدە وزگە ۇلت وكىلدەرى بىزگە: „سىزدەردە ارقاسۇيەر، تىرەۋ بولاتىن قازاقستان بار، مىقتى ازاماتتار بار!“ دەپ تامسانادى. سونداي ءبىر ساتتە ەرەكشە سەزىمگە بولەنگەنىمىزدى قالاي جاسىرايىن! سوندىقتان ارقاسۇيەر قازاقستانىمىز امان، اتامەكەنىمىزدىڭ تۋى كوك اسپاندا ماڭگى جەلبىرەي بەرسىن!».
سونىمەن قاتار، قازان ايىندا وتكەن «وتانداستار» فورۋمىندا دا الەمنىڭ 40 قا جۋىق مەملەكەتىنەن كەلگەن اعايىنعا ەستەلىك بولسىن دەگەن ماقساتتا قورجىن تاراتىلعان بولاتىن.
