«وتانداستار» قورى مەن «روسسوترۋدنيچەستۆو» اراسىندا ىنتىماقتاستىق تۋرالى مەموراندۋمعا قول قويىلماق
استانا. KAZINFORM - «وتانداستار» قورى مەن «روسسوترۋدنيچەستۆو» اراسىندا ىنتىماقتاستىق تۋرالى مەموراندۋمعا قول قويۋعا قاتىستى كەلىسسوزدەر جۇرگىزىلىپ جاتىر. بۇل تۋرالى اقوردادا رەسەي پرەزيدەنتى ۆلاديمير پۋتينمەن كەلىسسوزدەردىڭ قورىتىندىسىنا وراي وتكەن بريفينگتە مەملەكەت باسشىسى قاسىم-جومارت توقايەۆ ايتتى.
«ءبىزدىڭ حالىقتارىمىزدى بىرىكتىرەتىن ماڭىزدى فاكتور - ورىس ءتىلى. قازاقستان مەكتەپتەرىندەگى بارلىق ءبىلىم الۋشىلاردىڭ ۇشتەن ءبىرى ورىس تىلىندە ءبىلىم الاتىنىن اتاپ وتكىم كەلەدى. قازاقستاندا ءبىز بۇل ماسەلەگە ۇلكەن ءمان بەرەمىز. سوندىقتان مەن ورىس ءتىلى بويىنشا حالىقارالىق ۇيىم قۇرۋدى ۇسىنعان ەدىم»، - دەدى پرەزيدەنت.
مەملەكەت باسشىسى كەلىسسوزدەردىڭ تاعى ءبىر وزەكتى تاقىرىبى قازاقستان جانە رەسەي اۋماعىندا تۇرىپ جاتقان وتانداستارعا قولداۋ كورسەتۋ بولعانىن ايتتى.
«بۇل رەتتە «وتانداستار» قورى مەن «روسسوترۋدنيچەستۆو» اراسىنداعى ىنتىماقتاستىق تۋرالى مەموراندۋمعا قول قويۋ ماڭىزدى مانگە يە بولار ەدى. بۇل تاقىرىپتا كەلىسسوزدەر جۇرگىزىلىپ جاتىر. مۇنداي ۋاعدالاستىقتار حالىقتارىمىز اراسىنداعى ءوزارا تۇسىنىكستىكتى نىعايتۋدا ايرىقشا ءرول ويناپ، جالپى قوعامتاستىقتىڭ وڭ كوزقاراسىن تابادى»، - دەدى قاسىم-جومارت توقايەۆ.
