وتانداستار قورى «ۇلى دالا» حالىقارالىق كىتاپ شىعارۋ بايقاۋىن جاريالادى
استانا. KAZINFORM - «وتانداستار قورى» ك ە ا ق مەن قازاقستان جازۋشىلار وداعىنىڭ رەسپۋبليكالىق قوعامدىق بىرلەستىگى 2025 -جىلعا ارنالعان «ۇلى دالا» حالىقارالىق بايقاۋىن جاريالادى.

بايقاۋدىڭ ماقساتى - شەتەلدەگى ەتنيكالىق قازاقتاردىڭ اراسىندا قازاق ءتىلىن، داستۇرلەرى مەن مادەنيەتىن ىلگەرىلەتۋ جانە ناسيحاتتاۋ. سونىمەن قوسا شەتەلدەگى ەتنيكالىق قازاقتاردىڭ كوشى- قونى تاريحى مەن ءومىر جولدارىن، ولاردىڭ تۇرمىس- سالتى مەن داستۇرلەرىن، ادەبيەتى مەن ونەرىن جانە باسقا دا تاقىرىپتاردى قامتيتىن كوركەم- ادەبي، تاريحي شىعارمالار مەن عىلىمي زەرتتەۋلەر جيناعىن شىعارۋ.
بايقاۋدىڭ نەگىزگى ماقساتى مەن مىندەتتەرى
شەتەلدەگى ەتنيكالىق قازاكتاردىڭ تاريحى، مادەنيەتى مەن ادەبيەتى، عىلىمى، ءبىلىمى، ونەرى، ولاردىڭ قازاق رۋحانياتىنا قوسقان ۇلەستەرى تۋرالى شەتەلدىك بەلگىلى اقىن-جازۋشىلار، عالىمدار مەن ونەرپازداردىڭ تۋىندىلارىن باسىپ شىعارۋ ارقىلى ۇلتتىق تاريحىمىز بەن مادەنيەتىمىزدى جاڭا قىرىنان تانۋ.
شەتەلدەگى قازاقتاردىڭ تاريحى، سالت-ءداستۇرى، ادەبيەتى مەن مادەنيەتى، عىلىم مەن ونەرى، رۋحاني دامۋىنا ۇلەس قوسقان تانىمال، بەلگىلى ەتنيكالىق قازاق وكىلدەرىنىڭ ەسىمدەرىن قازاقستاندىق كوپشىلىك قاۋىمعا كەڭىنەن تانىستىرۋ.
جاس ۇرپاقتىڭ بويىندا ءتول تاريحىمىز بەن مادەنيەتىمىزگە دەگەن قىزىعۋشىلىقتى كۇشەيتۋ، ۇلتتىق سانانى جاڭعىرتۋ.
بايقاۋ وتكىزۋ مەرزىمى جانە ءتارتىبى
بايقاۋدى ۇيىمداستىرۋ جانە وتكىزۋگە جۇمىسشى توبى جاۋاپتى.
بايقاۋعا قاتىسۋ تۋرالى ءوتىنىم مەن شىعارمالار 2025 -جىلدىڭ 1 - مامىرىنا دەيىن قابىلدانادى. وتىنىمدەر كەلەسى مەكەنجايعا جىبەرىلۋى ءتيىس: استانا قالاسى، د. قونايەۆ كوشەسى، 12/1 ءۇي، «وتانداستار قورى» كەاق، نەمەسە پوشتا ارقىلى:[email protected]
بايقاۋعا قاتىسۋ شارتتارى
بايقاۋعا شەتەلدەردەگى ەتنيكالىق قازاقتار، وتانداستار، شەتەلدىك اقىن-جازۋشىلار، تاريحشىلار، عالىمدار، مادەنيەت، ونەر جانە قوعام قايراتكەرلەرى، جۋرناليستەر، جەكە جانە زاڭدى تۇلعالار قاتىسا الادى.
بايقاۋعا شەتەلدەگى ەتنيكالىق قازاقتاردىڭ تاريحى، سالت- ساناسى مەن ءداستۇرى، ادەبيەت پەن مادەنيەت، تەاتر، سپورت، ونەر، عىلىمي سالاعا بايلانىستى شىعارمالار، سونداي- اق شەتەلدەگى تاريحي، بەلگىلى تانىمال تۇلعالار جانە ولار تۋرالى ەڭبەكتەر ۇسىنىلادى.
جۇمىسقا قويىلاتىن تالاپتار
فورمات: Word نەمەسە PDF
شريفت: Times New Roman, 14 كەگەل، جولارالىق ينتەرۆال - 1
قاتىسۋشى تۋرالى اقپارات: اتى- ءجونى، مەملەكەتى، جاسى، بايلانىس تەلەفونى
اۆتور اۆتورلىق قۇقىقتىڭ بەرىلۋىنە كەپىلدىك بەرەدى.
بايقاۋ جەڭىمپازدارىنىڭ جۇمىستارى
بايقاۋ جەڭىمپازدارىنىڭ جۇمىستارىن، باسپادان شىققان كىتاپتاردى ۇيىمداستىرۋشى ەلىمىزدەگى ءىرى كىتاپحانالار مەن عىلىمي- مادەني ورتالىقتارعا تاراتادى. كىتاپتاردىڭ ەلەكتروندى نۇسقاسى «وتانداستار قورى» مەن قازاقستان جازۋشىلار وداعىنىڭ ۆەب- سايتتارىنا ورنالاستىرىلادى.
ابىلايحان جۇماشيەۆ