وسىمدىكتەن جاسالعان ەت تاماق بولا ما؟
جەر بەتىندەگى زياندى گازدىڭ 25 پايىزى، ازىق- تۇلىك وندىرىسىنە تيەسىلى. ونىڭ ىشىندە ەڭ قاۋىپتىسى، ءىرى قاراعا تيەسىلى. ەكولوگتار بۇل ماسەلەنى شەشۋدىڭ بىردەن ءبىر جولى رەتىندە، وسىمدىكتەن بالامالى ەت ءوندىرۋدى ۇسىنىپ وتىر.

كليماتتىڭ وزگەرۋىنە اۋىل شارۋاشىلىعىنىڭ كەرى اسەرى كوپ ەكەنىن ەكىنىڭ ءبىرى بىلە بىرمەيدى. اسىرەسە جاھاندىق جىلىنۋعا مال مەن تىڭايتقىشتىڭ تەرىس ىقپالى زور. ب ۇ ۇ زەرتتەۋلەرىنە جۇگىنسەك، جاھاندىق جىلىنۋدىڭ 14 پايىزى مال شارۋاشىلىعىنىڭ ۇلەسىندە. بۇل كولىك، ۇشاق جانە باسقا دا قوزعالىس قۇرالدارى شىعاراتىن گازدىڭ جيىنتىق كولەمىنەن ارتىق.
تاناۆات تەنسين، ب ۇ ۇ مال شارۋاشىلىعى جانە دەنساۋلىقتى قورعاۋ ءبولىمىنىڭ باسشىسى:
- زياندى گاز كولەمىن ازايتۋ ءۇشىن ءبىز جەم- شوپتەن باستاپ قورشاعان ورتانى لاستايتىن بارلىق ءىستى ازايتۋعا كۇش سالۋىمىز قاجەت. اۋىل جانە مال شارۋاشىلىعىنىڭ تيىمدىلىگىن ارتتىرعان ءجون.
پارنيكتىك گاز بەن مەتان كوبىنە سيىر ەتىن ءوندىرۋ كەزىندە بولىنەدى. ورتاشا ەسەپپەن العاندا الەمدە 100 گرامم سيىر ەتىن دايىنداۋ ءۇشىن 50 كەلى پارنيكتىك گاز شىعارىلادى. قازىر اقۋىز ءوندىرۋدى قولعا العان كومپانيالار بار.
ەد ستيل، بيوتەحنولوگيالىق كومپانيا باسشىسى:
- ءبىزدىڭ ءونىمنىڭ كادىمگى ەتكە قاراعاندا شىعىنى از ءارى باعاسى ارزانداۋ. قازىر ەت ساۋدا ورتالىقتارىندا ساتىلاتىن شۇجىق جانە باسقا دا تاماقتان قىمبات. ءبىراق بۇل ۋاقىت وتە كەلە وزگەرەتىنىنە سەنىمىم مول. الەمدىك ستارتاپتار قازىردىڭ وزىندە ۇكىمەتتەر مەن قورلاردى ءداستۇرلى مال شارۋشىلىعىنان بىرتىندەپ باس تارتىپ، ەتتى وسىمدىكتەن جاساۋعا شاقىرىپ وتىر. ساراپشىلار بۇل كليماتتىڭ وزگەرۋىمەن ءتيىمدى كۇرەسۋگە جانە 2050- جىلعا قاراي 9 جارىم ميلليارد ادامدى تاماقتاندىرۋعا مۇمكىندىك بەرەدى.
داۋرەن اقاش ۇلى، جاننا قۇسايىنوۆا
www.24.kz