وسى جىلى قازاقستاننان ەت ونىمدەرى قاي ەلدەرگە شىعارىلدى

استانا. KAZINFORM - ق ر ساۋدا جانە ينتەگراتسيا مينيسترلىگى كورشى ەلدەرگە جانە ەۋروپا وداعىنا اۋىل شارۋاشىلىعى ونىمدەرىن ەكسپورتتاۋ كولەمىنە قاتىستى تۇسىنىك بەردى.

- قازاقستان بيىلعى ءبىرىنشى توقساندا ەكسپورتقا 10,8 مىڭ توننا قۇس ەتى ونىمدەرىن 17,9 ميلليون ا ق ش دوللارى سوماسىندا رەسەي، قىرعىزستان، بەلارۋس، وزبەكستان، قاتار جانە ازەربايجانعا ەكسپورتتادى. سونداي- اق، 4,6 مىڭ توننا قوي ەتىن 8,6 ميلليون ا ق ش دوللارىنا وزبەكستانعا، قاتارعا، ب ا ءا، كۋۆەيتكە، ساۋد ارابياسىنا، يرانعا، تاجىكستانعا، يوردانياعا شىعاردى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

سونىمەن قاتار، وسى جىلدىڭ ءبىرىنشى توقسانىندا قىتاي مەن ەۋروپا باعىتىندا ەت جانە وزگە دە ونىمدەر ەكسپورتقا شىعارىلماعان.

- الايدا، قىتايعا اۋىل شارۋاشىلىعى ونىمدەرىنىڭ مىناداي تۇرلەرى ارتقانىن نازارىڭىزعا سالامىز. اتاپ ايتقاندا، كۇنباعىس مايى 65,4 ميلليون ا ق ش دوللارىنا (2,4 ەسە ءوستى)، زىعىر تۇقىمى 39,2 ميلليون ا ق ش دوللارىنا (3 ەسە ارتتى)، كۇنباعىس تۇقىمى 30,3 ميلليون دوللارعا (%66,6 عا ءوستى)، ارپا ءداندى جانە بۇرشاق داقىلدارىن قايتا وڭدەۋ قالدىقتارى 14,1 ميلليون ا ق ش دوللارىنا (%55,7 عا ءوستى) جەتتى. سونداي-اق، ەۋروپا وداعىنا بيداي 53,9 ميلليون ا ق ش دوللارىنا (%47,7 عا ءوستى)، زىعىر تۇقىمى 39,2 ميلليون دوللارعا (2,6 ەسە ارتتى)، راپس تۇقىمى 15,3 ميلليون دوللارعا (7,9 ەسە ارتتى)، كەپتىرىلگەن كوكونىس بۇرشاق داقىلدارى 7,7 ميلليون دوللارعا (20 ەسە ارتتى) ەكسپورتتالدى، - دەپ ناقتىلادى ۆەدومستۆو.

ايتا كەتەيىك، بۇعان دەيىن اۋىل شارۋاشىلىعى مينيسترلىگى بىلتىر قازاقستان قاي ەلدەرگە قانشا ەت ەكسپورتتاعانىن مالىمدەگەن بولاتىن.