وسكەمەندىك مۇعالىمگە 100 ميلليون تەڭگە جالاقى نەگىزسىز تولەنبەك بولعان
وسكەمەن قالاسىنداعى مەكتەپتەردىڭ بىرىندە ماتەماتيكا ءپانىنىڭ مۇعالىمىنە 100 ميلليون تەڭگەدەن استام جالاقى نەگىزسىز تولەنبەك بولعانى انىقتالدى، دەپ حابارلايدى قازاقپارات ءتىلشىسى.
شىعىس قازاقستان وبلىسىندا سوڭعى 4 جىلدا ءبىلىم بەرۋ مەكەمەلەرىندەگى 50 قىزمەتكەر سوتتالدى. سونىڭ سالدارىنان مەملەكەتكە 277 ميلليون تەڭگە زالال كەلتىرىلگەن. قازىرگى ۋاقىتتا بۇل سومانىڭ %42 دان استامى وتەلدى. بۇل تۋرالى بۇگىن باسپا ءسوز بريفينگى بارىسىندا شقو بويىنشا سىبايلاس جەمقورلىققا قارسى قىزمەت باسشىسى دەنيس شاكەنوۆ مالىمدەدى.
«دەپارتامەنت ءبىلىم سالاسىنداعى سىبايلاس جەمقورلىق تاۋەكەلدەرىنە تالداۋ جۇرگىزدى. سونىڭ بارىسىندا كوپتەگەن بۇزۋشىلىق پەن سىبايلاس جەمقورلىق تاۋەكەلدەرى انىقتالدى. ماسەلەن، بيۋدجەتتىك ءوتىنىمدى جاساندى تۇردە اسىرا باعالاۋ. وسكەمەندەگى كوممۋنالدىق مەكەمەلەردىڭ بىرىندە «قوسىمشا ءبىلىم بەرۋ پەداگوگى» ماماندىعى بويىنشا 7 بوس ورىنعا 2023 -جىلعا ارنالعان بيۋدجەتتىك قاراجات سۇرانىسىندا 11 جىلدان 29 جىلعا دەيىنگى جۇمىس ءوتىلى نەگىزسىز كورسەتىلگەن. ناتيجەسىندە بيۋدجەتتىڭ جالپى سوماسى 16,2 ميلليون تەڭگەگە ۇلعايتىلدى. وسىلايشا، قاجەتسىز سۇرالعان قاراجاتتى جىمقىرۋ تۇرىندەگى سىبايلاس جەمقورلىق تاۋەكەلى تۋىندادى»، - دەيدى ول.
تاعى ءبىر سىبايلاس جەمقورلىق تاۋەكەلى - بيۋدجەتتىك وتىنىمدەردى قاعاز جۇزىندە راسىمدەۋ. وسكەمەن قالاسى مەكتەپتەرىنىڭ بىرىندە ماتەماتيكا ءپانى مۇعالىمىنە بەلگىلەنگەن جالاقىعا %35 قوسىمشانىڭ ورنىنا %3500 تولەم كورسەتىلگەن. سونىڭ سالدارىنان تەك ءبىر مۇعالىمگە 104,7 ميلليون تەڭگە جالاقى نەگىزسىز تولەنە جازدادى.
«مەكتەپ قىزمەتكەرلەرىنىڭ بانكتىك كارتوچكالىق شوتتارىن اۋىستىرۋ ارقىلى بيۋدجەت قاراجاتىن جىمقىرۋ فاكتىلەرى دە ءجيى كەزدەسەدى. ريددەر قالاسىنداعى ورتا مەكتەپتەردىڭ بىرىندە ديرەكتوردىڭ جانە باس بۋحگالتەردىڭ جاقىن تۋىستارىنا 9,6 ميلليون تەڭگە قاراجات جالاقى رەتىندە نەگىزسىز اۋدارىلعان»، - دەيدى دەنيس شاكەنوۆ.
