وسكەمەندەگى ەكولوگيالىق جوبا حالىقارالىق سىيلىققا يە بولدى
وسكەمەن. KAZINFORM - وسكەمەندەگى و. بوكەي اتىنداعى قالالىق ورتالىق كىتاپحانانىڭ «بوريس شەرباكوۆتىڭ جاسىل ءۇيى» ەكو-ورتالىعى» الەۋمەتتىك جوباسى حالىقارالىق EIFL سىيلىعىنىڭ جەڭىمپازى اتاندى.
كىتاپحانانىڭ بالالار ەكوزەرتحاناسى زاماناۋي سيفرلىق جابدىقتارمەن جابدىقتالعان. بالالار ءوز زەرتتەۋىندە ەلەكتروندى ميكروسكوپتى، «جاس ەكولوگ» قۇرىلعىسىن، سۋ، اۋا، توپىراق كورسەتكىشتەرىن زەرتتەۋگە ارنالعان جيىنتىقتى، 3D پرينتەردى جانە ينتەراكتيۆتى پانەلدى پايدالانۋ مۇمكىندىگىنە يە بولدى.
«جۇرتتىڭ ەكولوگيالىق مادەنيەتىن قالىپتاستىرۋ ماقساتىندا قولعا الىنعان تىڭ باعدارلاما اياسىندا زاماناۋي سيفرلىق ەكو-زەرتحانا قۇرىلعان بولاتىن. قازىرگى ۋاقىتتا ەكولوگيالىق ءبىلىم بەرۋدەگى ءتۇرلى ماسەلەلەردى شەشۋدە سيفرلىق جانە مەديا ساۋاتتىلىقتىڭ ەرەكشە ورىن الاتىنى ءسوزسىز. حالىقارالىق ساراپشىلار ۇزدىكتەردى انىقتار الدىندا ءار جوبانى بۇگە-شۇگەسىنە دەيىن زەردەلەپ شىققان. «بوريس شەرباكوۆتىڭ جاسىل ءۇيى» ەكو-ورتالىعى» جوباسى جەڭىمپاز دەپ تانىلعان 4 جوبانىڭ ءبىرى بولدى»، - دەيدى و. بوكەي اتىنداعى قالالىق ورتالىق كىتاپحانا ديرەكتورىنىڭ ورىنباسارى ايگۇل احمەتجانوۆا.
جاس ەكولوگتار 3D-پرينتەر ارقىلى قۇستاردىڭ ۇياسىن، كىشكەنتاي جان-جانۋارلارعا ارنالعان پروتەزدەر جانە وسىمدىكتەرگە ارنالعان ىدىستار، ەكوكادەسىيلار باسىپ شىعارىپ جاتىر. ولكە تانۋشى-عالىم بوريس شەرباكوۆتىڭ جەتەكشىلىگىمەن وقۋشىلار مەن مۇعالىمدەر شىعىس قازاقستاندا سيرەك كەزدەسەتىن جانە قۇرىپ كەتۋ قاۋپى تونگەن جانۋارلار مەن وسىمدىكتەر تۋرالى «ش ق و قىزىل كىتابى» ەلەكتروندىق دەرەكتەر بازاسىن قۇرعان.
