وسكەمەندە 3 بىردەي وقۋشىنى كولىك قاعىپ كەتتى

وسكەمەن قالاسىندا كولىك قاققان 3 وقۋشى اۋرۋحاناعا ءتۇستى، دەپ حابارلايدى Kazinform.

ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، جول-كولىك وقيعاسى 14-قاراشا كۇنى كەشكى ۋاقىتتا بولعان.

13-14 جاس ارالىعىنداعى بالالار جاتتىعۋدان شىعىپ، ۇيلەرىنە قايتىپ بارا جاتقان.

«ساتبايەۆ كوشەسى مەن جىبەك جولى داڭعىلىنىڭ قيىلىسىندا كەلە جاتقان جەڭىل كولىك جۇرگىزۋشىسى جولدان ءوتىپ بارا جاتقان 3 بالانى قاعىپ كەتتى. سونىڭ سالدارىنان ءتۇرلى دەنە جاراقاتىن العان ۇشەۋى دە اۋرۋحاناعا جاتقىزىلدى»، - دەلىنگەن اقپاراتتا.

قازىرگى ۋاقىتتا اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 345-بابى 2-بولىگىنە سايكەس سوتقا دەيىنگى تەرگەۋ امالدارى ءجۇرىپ جاتىر.

«ءبىرقاتار سوت-مەديتسينالىق ساراپتاما تاعايىندالعان. سونىڭ قورىتىندىسى بويىنشا پروتسەسسۋالدىق شەشىم قابىلدانادى»، - دەلىنگەن حابارلامادا.

اۆتور

تالعاتجان مۇحامەتبەك ۇلى