وسكەمەندە 2 مىڭعا جۋىق كوشە شامى جانباي تۇر

وسكەمەن. KAZINFORM - وسكەمەن قالاسىنىڭ كوشەلەرىندە ورناتىلعان كوشە شامدارىنىڭ ىشىندە 2 مىڭعا جۋىعى جانباي تۇر.

قالا تۇرعىندارى اراسىندا كەش باتقاندا كوشەلەرى قارا تۇنەككە مالىناتىندىعىنا شاعىمداناتىندار كوبەيىپ كەلەدى. وسى ماسەلەنى شەشۋ ءۇشىن نە ىستەلىپ جاتقاندىعىن اكىمدىكتىڭ كوشەلەردى جارىقتاندىرۋ جۇيەسىن جاڭعىرتۋ جونىندەگى جۇمىس توبىنىڭ جەتەكشىسى رينات بۇتاجانوۆ ايتىپ بەردى.

«قازىرگى تاڭدا 11583 شام، 212 شاقىرىم كابەل اۋىستىرىلىپ، 11 سىرتقى جارىقتاندىرۋدى باسقارۋ شكافتارى ورناتىلعان. دەگەنمەن، جاڭادان ورناتىلعان شامدار تەز ىستەن شىعادى نەمەسە مۇلدەم جانبايدى. قالادا بارلىعى ەكى مىڭعا جۋىق جۇمىس ىستەمەيتىن شام بار. شامداردىڭ جانباۋىنىڭ نەگىزگى فاكتورلارى - جەلىلەردىڭ توزۋى، اۋا رايى جاعدايى، جەلىلەردى سالۋ كەزىندە جۇمىستىڭ ساپاسىزدىعى»، - دەيدى رينات بۇتاجانوۆ.

ونىڭ ايتۋىنشا، جالپى وسكەمەندە كوشەلەردى جارىقتاندىرۋ جۇيەسىن جاڭعىرتۋ جوباسى بىرنەشە جىل بۇرىن باستالعان. جوبا ءالى اياقتالعان جوق.

«ەگەر Everlight Electronics Co كومپانياسى ءوز مىندەتتەمەلەرىن ورىنداسا، كەمشىلىكتەر تۇزەتىلەدى. قازىر قوسالقى مەردىگەر Digital Security قالپىنا كەلتىرۋ جۇمىستارىن كۇشەيتىلگەن رەجيمدە جۇرگىزۋدە. 2024 -جىلدىڭ سوڭىنا دەيىن وسكەمەندەگى كوشەلەردى جارىقتاندىرۋ جۇيەلەرىن جاڭعىرتۋ جوباسىن اياقتاۋدى جوسپارلاپ وتىرمىز»، - دەيدى كوشەلەردى جارىقتاندىرۋ جۇيەسىن جاڭعىرتۋ جونىندەگى جۇمىس توبىنىڭ جەتەكشىسى.

اۆتور
تالعاتجان مۇحامەتبەك ۇلى