وسكەمەن- ولگەي اۋە قاتىناسى اشىلادى
استانا. KAZINFORM - قازاقستان مەن موڭعوليا وسكەمەن-ولگەي باعىتىندا اۋە رەيسىن اشۋعا كەلىستى. بۇل تۋرالى اقوردادا موڭعوليا پرەزيدەنتى ۋحنااگين حۋرەلسۇحپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
- سونىمەن بىرگە اۋە قاتىناسىن جانداندىرۋ ماڭىزدى. قازىر الماتى- ۇلانباتىر باعىتىندا تۇراقتى رەيستەر بار. كوپ ۇزاماي استانا- ۇلانباتىر اۋە قاتىناسى قايتا اشىلادى. بۇدان بولەك، ءبىز وسى ساپار اياسىنداعى كەلىسسوزدەر ناتيجەسىندە وسكەمەن- ولگەي باعىتى بويىنشا اۋە قاتىناسىن ورناتۋ جونىندە ناقتى كەلىسىمگە كەلدىك. بۇل ماڭىزدى شەشىمنىڭ ارقاسىندا ىنتىماقتاستىعىمىز ودان ارى نىعايىپ، ايماقارالىق بايلانىستارىمىز تىڭ سەرپىنمەن دامي تۇسەرى ءسوزسىز، - دەدى پرەزيدەنت.
وسى ورايدا قاسىم-جومارت توقايەۆ موڭعوليا ەلىنىڭ باسشىسى حۋرەلسۇح مىرزاعا جانە موڭعول تاراپىنان وسى ماسەلەنى شەشۋگە اتسالىسقان بارشا ازاماتقا العىس ايتتى.
