وسكەمەن عالىمدارى جاساپ شىعارعان تيتان يمپلانتتار كىمدەرگە تەگىن بەرىلەدى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا تيتاننان جاسالعان وتاندىق يمپلانتتار قانداي ناۋقاستارعا تەگىن بەرىلەتىنىن ايتتى.

- بۇل جەردە ءبارى زاڭ بويىنشا جاسالادى. مىسالى، كۆوتا ارقىلى كەلگەن، الەۋمەتتىك وسال توپتاردان شىققان ازاماتتارعا، تەگىن كەپىلدەندىرىلگەن مەملەكەتتىك مەديتسينالىق كومەك الاتىندارعا تەگىنە بەرىلەدى. قازىر وسكەمەندە جەكەمەنشىك ينۆەستورمەن بىرگە زاۋىت قۇرىپ جاتىرمىز. ويتكەنى ۋنيۆەرسيتەتتىڭ ىشكى ينۆەستيتسياسى (د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەت) جەتپەيدى، - دەدى ول.

مينيستر بۇيىمداردىڭ باعاسى ءالى ەسەپتەلمەگەنىن ايتادى.

- ينۆەستورلار مەديتسينالىق كومپانيا قۇرىپ، بۇكىل اۋرۋحانالارعا ساتادى. ءبىراق ول وتە ارزان بولادى. نەگە دەسەڭىز، تيتان وزىمىزدىكى، كەدەندىك الىمدار دا جوق. ماركەتينگتى ءالى ەسەپتەگەن جوق. سوندىقتان ناقتى باعاسىن ءالى ايتا المايمىن. شەتەلدىك بالامالارىنان كەمىندە بىرنەشە ەسە ارزان بولادى، - دەدى ۆەدومستۆو باسشىسى.

ايتا كەتەيىك، بۇگىن مينيستر ساياسات نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا تيتاننان جاسالعان وتاندىق يمپلانتتاردى تانىستىردى.