وسكەمەندە پوليتسەي كوز جۇمعان ءدامحاناداعى كيكىلجىڭدە زارداپ شەككەن ەر ادامنىڭ جاعدايى قالاي
وسكەمەن. KAZINFORM - وسكەمەن قالاسىندا پوليتسيا قىزمەتكەرى كوز جۇمعان ءدامحاناداعى كيكىلجىڭدە زارداپ شەككەن ەر ادام ءقازىر اۋرۋحانادا جاتىر.
ەسكە سالساق، وقيعا 4-قازانعا قاراعان ءتۇنى قالاداعى ءدامحانالاردىڭ بىرىندە بولعان. ءدامحاناعا كەلۋشىلەردىڭ ءبىرى ءوزىن دۇرىس ۇستاماعانى ءۇشىن ەسكەرتۋ جاساعان 40 جاستاعى جەرگىلىكتى تۇرعىنعا دەنە جاراقاتىن كەلتىرگەن.
العان جاراقاتتارىنىڭ سالدارىنان ول كوز جۇمدى. كۇدىكتىنىڭ ارەكەتىنەن تاعى ءبىر ازامات زارداپ شەكتى. كەيىن مارقۇمنىڭ پوليتسيا قىزمەتكەرى ەكەنى، ءبىراق وقيعا كەزىندە ونىڭ قىزمەتتە بولماعانى انىقتالدى.
ش ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنە سۇيەنسەك، زارداپ شەككەن ەر ادام قازىرگى ۋاقىتتا مامانداندىرىلعان مەديتسينالىق ورتالىقتا جاتىر.
- ول نەيروحيرۋرگيا بولىمىندە ءتيىستى ەم قابىلداپ جاتىر. پاتسيەنتتىڭ جاعدايى ورتاشا اۋىر دەپ باعالاندى. جاقىن كۇندەرى ونى اۋرۋحانادان شىعارۋ جوسپارلانعان، - دەلىنگەن اقپاراتتا.
