وسكەمەندە جىل سوڭىنا دەيىن 600 يەسىز ءيتتى اۋلاۋعا 16,5 ميلليون تەڭگە ءبولىندى
وسكەمەن. KAZINFORM - وسكەمەندە قاراۋسىز جۇرگەن جانۋارلاردىڭ سانىن رەتتەۋ بويىنشا جاڭا كەلىسىمشارت جاسالدى. مەردىگەر ۇيىم 31-جەلتوقسانعا دەيىن 600 ءيتتى اۋلاپ، ۆاكتسينا سالىپ، چيپتەۋگە مىندەتتەلگەن. بۇل جۇمىستارعا بيۋدجەتتەن 16,56 ميلليون تەڭگە قاراستىرىلعان.
مەملەكەتتىك ساتىپ الۋ قۇجاتتارىن تالداۋ ناتيجەسىندە كەلىسىمشارتتىڭ جالپى سوماسىن جوسپارلانعان جانۋارلار سانىنا بولگەندە، ءبىر يتكە جۇرگىزىلەتىن كەشەندى جۇمىستىڭ قۇنى 27,6 مىڭ تەڭگەنى قۇرايتىنى بەلگىلى بولدى. بۇل قاراجاتقا مەردىگەر جانۋارلاردى اۋلاۋ، ۋاقىتشا ۇستاۋ، ۆاكتسيناتسيالاۋ، سايكەستەندىرۋ جۇمىستارىن جۇرگىزۋگە، قۇجاتتارى تەكسەرىلگەننەن كەيىن يەسى تابىلعان جاعدايدا جانۋاردى وعان قايتارۋعا مىندەتتى.
مەملەكەتتىك ساتىپ الۋ پورتالىنىڭ مالىمەتىنشە، قىزمەت كورسەتۋشى كومپانيا استانا قالاسىندا تىركەلگەن. الايدا تىزىلىمدە وسكەمەن قالاسىنداعى قوسىمشا مەكەنجايى دا كورسەتىلگەن.
سونىمەن قاتار تەحنيكالىق تاپسىرمادا ناقتىلاۋدى قاجەت ەتەتىن ەكى ماسەلە بار. اتاپ ايتقاندا، شىعىندار سمەتاسىندا جانۋارلاردى زارارسىزداندىرۋ جۇمىستارى قاراستىرىلعانىمەن، جۇرگىزىلەتىن وپەراتسيالاردىڭ ناقتى سانى كورسەتىلمەگەن. بۇدان بولەك، بيۋدجەتتىك باعدارلاما تەك يتتەردى عانا ەمەس، قاڭعىرعان مىسىقتاردى دا اۋلاۋدى كوزدەيدى. الايدا تەحنيكالىق تاپسىرمادا اۋلاۋ جانە زارارسىزداندىرۋ جوسپارى تەك 600 يتكە قاتىستى بەلگىلەنگەن.
جوسپارلانعان جۇمىستى وسى جىلدىڭ سوڭىنا دەيىن اياقتاۋ ءۇشىن مەردىگەرگە كۇن سايىن ورتا ەسەپپەن 8-10 جانۋاردان اۋلاۋعا تۋرا كەلەدى. بۇل كورسەتكىش دەمالىس كۇندەرىن دە قامتيدى. كەلىسىمشارت تالاپتارىنا سايكەس، جۇمىسقا ءارقايسىسى ءۇش ادامنان تۇراتىن كەمىندە ەكى ءموبيلدى بريگادا جۇمىلدىرىلۋى ءتيىس. ال قالا تۇرعىندارى مەن ۇيىمداردان تۇسكەن وتىنىمدەرگە جاۋاپ بەرۋ ۋاقىتى 24 ساعاتتان اسپاۋى كەرەك.
جانۋارلاردى ۋاقىتشا ۇستاۋ ورىندارىنا قويىلاتىن تالاپتار دا قاتاڭ بەلگىلەنگەن.
- ۋاقىتشا ۇستاۋ پۋنكتىندە جاۋىن- شاشىننان قورعالعان، ەدەنى قۇرعاق ءارى جىلىتىلعان ۇيشىكتەرمەن جابدىقتالعان كەمىندە 50 ۆولەر بولۋى قاجەت. ءىرى يتتەردىڭ ءارقايسىسىنا 5-6 شارشى مەتردەن كەم ەمەس ورىن قاراستىرىلۋى ءتيىس. جانۋارلاردى ۇستاۋ مەرزىمى 15 كۇنمەن شەكتەلەدى. وسى ۋاقىت ىشىندە ولار ازىق-تۇلىكپەن، سۋمەن جانە ۆەتەريناريالىق كومەكپەن قامتاماسىز ەتىلۋى كەرەك، - دەلىنگەن مەملەكەتتىك ساتىپ الۋ قۇجاتتاماسىندا.
جۇمىستىڭ ورىندالۋىن باقىلاۋ جانە جالعان ەسەپ بەرۋگە جول بەرمەۋ ماقساتىندا مەردىگەر ءار كەزەڭدى فوتوعا تۇسىرۋگە مىندەتتى، ياعني جانۋاردى كوشەدەن اۋلاۋدان باستاپ، ۆەتەريناريالىق پروتسەدۋرالار مەن ۆولەردە ۇستاۋعا دەيىنگى بارلىق جۇمىس تىركەلۋى ءتيىس. فوتوەسەپتەر جانۋارلاردى ەسەپكە الۋ جۋرنالىمەن بىرگە اي سايىن قالالىق تۇرعىن ءۇي-كوممۋنالدىق شارۋاشىلىق بولىمىنە تاپسىرىلۋى قاجەت.