وسكەمەندە داۋىلدان جيىرماعا جۋىق كولىك ءبۇلىندى
وسكەمەن. KAZINFORM - وسكەمەندە داۋىل سالدارىنان ۇستىنە اعاش قۇلاپ، زاقىمدانعان اۆتوكولىكتەردىڭ يەلەرىنەن ىشكى ىستەر ورگاندارىنا وتىنىشتەر ءالى ءتۇسىپ جاتىر.
قالا اكىمدىگىنىڭ مالىمەتىنشە، داۋىل كەزىندە ورتالىق كوشەلەردە جەل 15 اعاشتى قۇلاتقان. ولاردىڭ ءبىرقاتارى جول جيەگىندە تۇرعان اۆتوكولىكتەردىڭ ۇستىنە قۇلادى.
- قازىرگى ۋاقىتتا پوليتسياعا اعاشتاردىڭ قۇلاۋى سالدارىنان كولىكتەرى زاقىمدانعان 17 اۆتوكولىك يەسىنەن ارىز ءتۇستى، - دەپ حابارلادى شقو پوليتسيا دەپارتامەنتىنىڭ باسپا ءسوز قىزمەتىنەن.
پوليتسياعا ءالى بارلىق زارداپ شەككەن كولىك يەلەرى جۇگىنىپ ۇلگەرمەگەن بولۋى دا مۇمكىن.
ەسكە سالايىق، كەشە كۇندىز وسكەمەندە نوسەر جاڭبىر مەن بۇرشاق جاۋىپ، ەكپىندى جەل سوققان بولاتىن.
سونىڭ سالدارىنان شامامەن 25 مىڭ ادام جارىقسىز قالدى.
تۇرعىن ۇيلەردىڭ شاتىرلارى زاقىمدانىپ، اعاشتار قۇلاپ، باعدارشامدار ىستەن شىعىپ، جولداردىڭ جەكەلەگەن ۋچاسكەلەرىن سۋ باستى.
قازىرگى ۋاقىتتا قولايسىز اۋا رايىنىڭ سالدارى جويىلدى. كوممۋنالدىق قىزمەتتەر نەگىزگى كوشەلەردى تازارتۋ جۇمىستارىن اياقتاپ، شاعىن اۋدانداردى ەلەكتر ەنەرگياسىمەن تولىق قامتاماسىز ەتتى.
