ورىس، قازاق مەكتەپتەرى قازاق ءتىلىن قالاي وقىتادى؟

استانا. قازاقپارات – 21-مامىردا مەملەكەتتىك ءتىلدى دامىتۋ ينستيتۋتى «قازاقستان رەسپۋبليكاسىندا مەملەكەتتىك ءتىلدى دەڭگەيلىك وقىتۋدىڭ جۇيەسى» جوباسى اياسىندا «ورىس مەكتەپتەرى مەن پەداگوگيكالىق ەمەس كوللەدجدەردە مەملەكەتتىك ءتىلدى وقىتۋ ماسەلەسىنە» قاتىستى سەمينار ءوتتى، - دەپ حابارلايدى bugin.kz پورتالى.

پەداگوگيكا عىلىمدارىنىڭ دوكتورى ر. س. راحمەتوۆا وقۋ باعدارلاماسىنداعى گرامماتيكالىق تاقىرىپتاردىڭ بەرىلۋىنە توقتالىپ، وقۋلىقتارداعى ولقىلىقتاردى اتاپ ءوتتى. فيلولوگيا عىلىمدارىنىڭ كانديداتى ب. قاپالبەك ورىس بولىمىندە وقىتىلاتىن قازاق ءتىلى پانىنە قاتىستى وقۋ رەسۋرستارىنا توقتالىپ، قازاق ءتىلىن تەگىن جانە ءوز بەتىنشە ۇيرەنۋگە بولاتىن پورتال باعدارلاماسىمەن تانىستىردى.

مەكتەپتەردەگى وقۋلىقتار باسپاسىنىڭ ارتۇرلىلىگى مەن ساپاسىزدىعى، پەداگوگيكالىق ەمەس كوللەدجدەردەگى وقۋ باعدارلاماسىنان «كاسىبي قازاق ءتىلى» مەن «مەملەكەتتىك تىلدە ءىس قاعازدارىن جۇرگىزۋ» ءپانى الىنىپ تاستالعاندىعى اتالدى. الماتى قالاسىنداعى №97-جالپى ءبىلىم بەرەتىن مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى قىستاۋبايەۆا ايگۇل سەرىك قىزى:

قازاق ءتىلدى ەمەس مەكتەپتەردە قازاق ءتىلى مەن ادەبيەتى پاندەرىن 15 جىلدان استام ۋاقىت بويى وقىتىپ كەلەمىن. وسى كەزەڭ ارالىعىندا ۇسىنىلعان وقۋلىقتاردىڭ وقۋشىلاردىڭ سويلەۋ ارەكەتتەرىن دامىتۋعا باعىتتالماعانىن ايتۋ كەرەك. بۇل رەتتە وقۋلىقتار ماسەلەسى جايلى ا. بايتۇرسىن ۇلىنىڭ «بۇل كۇندە قازاقشا وقۋدا كەمشىلىك كوپ. اۋەلى، وقۋ قۇرالى، كىتاپتار جوق. ەكىنشى، قازاق مەكتەبىنە تۇزەلگەن پروگرامما جوق، ونسىز وقۋ ءبىر جوننەن شىقپايدى. ءۇشىنشى، بالا وقىتۋ عىلىمىنان حاباردار مۇعالىمدەر از. … وقۋ قۇرالدارى سايلى بولماسا، ونىڭ ىشىندە وقۋ كىتاپتارى وڭدى بولماسا، وقۋ دا وڭدى بولمايدى. شەبەرگە اسپاپ سەرىك، مۇعالىمگە قۇرال سەرىك. اسپاپسىز شەبەرلەر ەش نارسە ىستەي المايدى، قۇرالسىز مۇعالىمدەر بالا وقىتا المايدى» دەگەن ءسوزىنىڭ ءالى دە وزەكتى ەكەنىنە تاڭعالاسىز، - دەيدى.

سونداي-اق، بايانداماشى ءبىرقاتار ۇسىنىستار ءبىلدىردى.

«ورتا ءبىلىم بەرۋ جۇيەسىندە قازاق ءتىلى مەن ادەبيەتى بىرىكتىرىلىپ، ءبىر ءپان رەتىندە وقىتىلۋدا. مۇنداي ارالاس وقىتۋ كۇتىلەتىن ناتيجە بەرمەيدى. ويتكەنى شاكىرتتەرگە ءبىر ءپان اياسىندا ءتىل مەن ادەبيەتتى قاتار يگەرۋ قيىنعا سوعادى. مىسالى، حالىقارالىق تاجىريبەدە ءتىل مىندەتتى تۇردە جەكە ءپان رەتىندە وقىتىلادى»، - دەپ اتاپ وتىلگەن. ەندەشە، بولاشاقتا بۇل ەكى ءپان قايتادان بولەك وقىتىلا باستاۋىن قولعا الۋدى ۇسىنامىن»، - دەگەن ەدى.

جالپى، جوبانىڭ ماقساتى - قازاقستان رەسپۋبليكاسىندا قازاق ءتىلىن وقىتۋدىڭ قولدانىستاعى جۇيەسىن تالداۋ، ءار دەڭگەيگە ارناپ جاسالعان باعدارلامالاردى ساراپتاۋ، قازاق ءتىلى وقىتۋشىلارىنا ارنالعان نۇسقاۋلىقتار مەن ادىستەمەلىك قۇرالدار ازىرلەپ شىعارۋ، قازاق ءتىلىن مەملەكەتتىك ءتىل رەتىندە ءبىلۋدى انىقتاۋدىڭ دەڭگەيلىك تەستىلىك جۇيەسىن جاساپ، مەملەكەتتىك ءتىلدى ءبىلۋدىڭ قۇقىقتىق تالاپتارىن ازىرلەپ، ۇسىنۋ.