ورتتەن قازا تاپقان قازاقستاندىقتاردىڭ وتباسىنا 1 ميلليون تەڭگەدەن كومەك كورسەتىلەدى
الماتىدا حوستەلدە ءورت كەزىندە قازا تاپقان قازاقستان ازاماتتارىنىڭ تۋىستارىنا 1 ميلليون تەڭگە كولەمىندە كومەك بەرىلەدى.
بۇل تۋرالى وڭىرلىك كوممۋنكايتسيالار قىزمەتى بريفينگىندە المالى اۋدانىنىڭ اكىمى ايدار جاقىبايەۆ ايتتى، دەپ حابارلايدى Kazinform.
«قالا باسشىسى ەربولات دوسايەۆتىڭ تاپسىرماسى بويىنشا ءورت كەزىندە قازا تاپقانداردىڭ وتباسىلارىنا 1 ميلليون تەڭگە كولەمىندە قارجىلاي كومەك بولىنەدى. بۇعان دەيىن حابارلانعانداي، الماتى اكىمىنىڭ تاپسىرماسى بويىنشا اكىمدىك قازا تاپقانداردىڭ دەنەلەرىن تۋىستارى كورسەتكەن جەرگە، ونىڭ ىشىندە ەلىمىزدىڭ باسقا وڭىرلەرىنە تاسىمالداۋعا كومەكتەسەدى. ودان بولەك، الماتى قالاسى اۋماعىندا جەرلەۋ ءراسىمىن ۇيىمداستىرۋعا تولىق كومەك كورسەتىلەدى»، - دەدى ايدار جاقىبايەۆ.
ول سونداي-اق قازا تاپقان شەتەلدىك ازاماتتاردىڭ وتباسىلارىنا دا ءمايىتتى جەرلەۋ ورنىنا دەيىن تاسىمالداۋعا جاردەم جاسالاتىنىن ايتتى.
ەسكە سالايىق، بۇگىن الماتىدا حوستەل ورتەنىپ، 13 ادام قازا تاپتى. قالالىق توتەنشە جاعدايلار دەپارتامەنتىنىڭ مالىمەتىنشە، ءورت تۋرالى حابارلاما 30- قاراشا كۇنى ساعات 05:33 تە تۇسكەن. ءبىرىنشى ءورت ءسوندىرۋ ءبولىمى شاقىرتۋ ورنىنا 7 مينۋت ىشىندە جەتتى.
ورتتەن زارداپ شەككەن 2 ادام قالالىق جەدەل شۇعىل كومەك كورسەتۋ اۋرۋحاناسىنا جەتكىزىلدى. قالالىق دەنساۋلىق ساقتاۋ باسقارماسىنىڭ مالىمەتىنە سايكەس، ناۋقاستىڭ بىرىنە كومىرقىشقىل گازىنان ۋلانۋ دياگنوزى قويىلدى. سونداي-اق 59 ادام ەۆاكۋاتسيالانىپ، 56 سى جاقىن ماڭداعى مەكتەپكە ۋاقىتشا ورنالاستىرىلدى.
