ورتالىق ازيانىڭ بەس مەملەكەتى ءوز وداعىن قۇرا الا ما - ساراپشى پىكىرى

نازاربايەۆ ۋنيۆەرسيتەتىندە قازاقستاندىق جانە امەريكالىق الدىڭعى قاتارلى ساراپشىلار ورتالىق ازياداعى وكسۋس قوعامىنىڭ «Kazakhstan Futures» باعدارلاماسى اياسىندا جۇرگىزگەن زەرتتەۋ ناتيجەسىن تانىستىردى.

تالقىلانعان تاقىرىپتاردىڭ ءبىرى - ورتالىق ازيانىڭ بەس مەملەكەتىنىڭ جاڭا وداق قۇرا الۋ مۇمكىندىگى بولدى، دەپ حابارلايدى قازاقپارات ءتىلشىسى.

وكسۋس قوعامى - ۆاشينگتوندا نەگىزى قالانعان، ورتالىق ازيانىڭ باسقا الەممەن اكادەميالىق الماسۋىنا جاردەمدەسۋمەن اينالىساتىن كوممەرتسيالىق ەمەس ۇيىم. بيىل اقپاندا ۇيىم و ا ەلدەرىنىڭ ماسەلەلەرىن زەرتتەيتىن ساراپشىلاردى بىرىكتىرىپ، «Kazakhstan Futures» باعدارلاماسىن شىعاردى.

ماقساتى - ا ق ش پەن قازاقستاننىڭ قارىم-قاتىناسىن جاقسارتۋ.

نازاربايەۆ ۋنيۆەرسيتەتىنىڭ رەكتورى، دوكتور يلەسانمي ادەسيدا ءسوز سويلەپ، باعدارلامانىڭ ماڭىزىنا توقتالىپ ءوتتى.

- ءبىزدىڭ ۋنيۆەرسيتەت كوپتەگەن باعىت بويىنشا جۇمىس ىستەيدى، ونىڭ ىشىنە ەل بولاشاعىن جارقىن ەتەتىن قازاقستان كوشباسشىلارىن جاساۋ كىرەدى. مۇندا ساراپشىلار ورنىن تولتىرۋعا تىرىسىپ جاتقان ولقىلىق بار. ول - بۇل ءوڭىردى جانە ەلدى حالىقارالىق تۇرعىدان كورسەتەتىن زەرتتەۋلەر. ورتالىق ازيا الەمنىڭ الدىڭعى قاتارىندا تالقىلانىپ، قازاقستان، تاجىكستان مەن تۇرىكمەنستاندى بۇكىل الەم تانۋ ءۇشىن وسى ميسسياعا جەتۋىمىز كەرەك، - دەدى دوكتور يلەسانمي ادەسيدا.

وسى باعدارلاما اياسىندا نازاربايەۆ ۋنيۆەرسيتەتى مەملەكەتتىك ساياسات جوعارى مەكتەبىندە پروفەسسوردىڭ اسسيستەنتى جانىبەك ارىنوۆ قازاقستاندىق جانە امەريكالىق زەرتتەۋشىلەرمەن بىرلەسىپ، و ا ەلدەرىنىڭ سەرىكتەستىگىنە تالداۋ جاساعان.

- ءبىز و ا ەلدەرى اراسىندا سەرىكتەستىك پەن سەرپىننىڭ ارتۋىندا جاقسى ءۇردىس بار ەكەنىن بايقادىق. ورتالىق ازيا - الەمدەگى بايلانىسى ەڭ تومەن ايماق. بۇرىن بىزدە مۇددەسى وسى جەردە توعىساتىن ءتۇرلى الىپ دەرجاۆالاردىڭ ۇلكەن ويىنى تۋرالى نارراتيۆتەردىڭ ءبارى بولدى. ال و ا ەلدەرى وسى ۇلكەن كۇشتەردى تەڭ ۇستاۋعا تىرىسقانىمەن، قىسىمعا قارسى تۇراتىن قاۋقارى جوق»، - دەپ ەسەپتەيدى جانىبەك ارىنوۆ.

سونداي-اق ساراپشى كەيىنگى 7 جىلدا قوعامدا ەۋروپالىق وداق ءتارىزدى ورتالىق ازيانىڭ بەس ەلىنەن قۇرالعان جاڭا وداق قۇرۋ مۇمكىندىگى تالقىلانىپ جۇرگەنىن اتاپ ءوتتى.

- ماسەلە وتە كوپ، سەرىكتەستىكتى جالعاستىرا بەرۋ كەرەك. ەگەر وسى سەرپىن توقتاماي، جالعاسا بەرسە - 15-20 جىلدان كەيىن مۇنداي ۇيىم قۇرىلۋى ابدەن مۇمكىن. الداعى بەس جىلدا مۇنداي وقيعا بولادى دەپ ايتا المايمىن. بىزدە جارتىلاي رەسمي كەلىسىمدەر بار. ماسەلەن، دۋشانبەدە ارال تەڭىزىنە قاتىستى كەلىسىمگە قول قويىلدى. مەنىڭشە، مۇنداي پلاتفورمالار - باستاماسى عانا. ەۋروپالىق وداق - مەن ءۇشىن ەڭ ۇزدىك ۇلگى. مەن بۇل ۇلگىگە تامسانامىن. دەسە دە، ە و تا ءبىر تۇندە قۇرىلعان جوق. ولارعا دا ونداعان جىل قاجەت بولدى. ولار كودەكستەن باستادى، وسىنداي دەڭگەيگە جەتتى»، - دەدى زەرتتەۋشى.

«Kazakhstan Futures» باعدارلاماسى قازاقستانداعى ا ق ش ەلشىلىگىنىڭ جاريا ديپلوماتيا ءبولىمىنىڭ قولداۋىمەن جۇزەگە اساتىنىن ايتا كەتەيىك.