ورتالىق ازيا مەن قىتاي قارىم-قاتىناسى قاي باعىتتا دامىماق
تاشكەنت. KAZINFORM - وزبەكستان استاناسىندا ەكونوميكالىق جانە ساياسي تالداۋ ورتالىقتارىنىڭ «ورتالىق ازيا - قىتاي» IV فورۋمى ءوتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
ءىس- شاراعا ورتالىق ازيا ەلدەرى مەن قىتايدىڭ ساياسي-ەكونوميكالىق تالداۋ ورتالىقتارىنىڭ جەتەكشىلەرى، ديپلوماتتار جانە حالىقارالىق ساراپشىلار قاتىستى.
فورۋم اياسىندا ساياساتتانۋشىلار جانە ەكونوميستەر ورتالىق ازيانىڭ 5 مەملەكەتى مەن قىتاي اراسىنداعى قاۋىپسىزدىك، سيفرلىق ەكونوميكا، ساياسات، ەكولوگيا جانە گۋمانيتارلىق ماسەلەلەر بويىنشا ويلارىن ورتاعا سالىپ، پىكىر الماستى.
«قىتاي - قازاقستاننىڭ ماڭىزدى سىرتقى ساياسي سەرىكتەسى. وسى رەتتە اتالعان مەملەكەتتىڭ بىزگە، ءبىزدىڭ قىتايعا قاتىستى پوزيتسيامىزدى انىقتاپ الۋ قاجەت. ۇكىمەت قانداي دا ءبىر شەشىمدى قابىلداماس بۇرىن، اۋەلى ساراپشىلارعا جۇگىنەدى. تيىسىنشە، ماماندار ارنايى تالداۋ جۇرگىزىپ، بيلىككە ۇسىنىس ازىرلەيدى. سوندىقتان ءبىزدىڭ مىندەتىمىز - ەكى ەل اراسىنداعى قارىم- قاتىناستىڭ تاۋەكەلدەرى مەن مۇمكىندىكتەرىن ءوز ۋاقىتىندا انىقتاپ وتىرۋ»، - دەپ ويىن ورتاعا سالدى قازاقستاننىڭ ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى اسقار نۇرشا.
بۇگىندە ورتالىق ازيا ەلدەرى ءوزىنىڭ جەكە مۇددەلەرىنە ساي ماسەلەلەرىن قىتايمەن ەكىجاقتى كەزدەسۋلەردە تالقىلاپ ءجۇر. بۇل رەتتە وزبەكستاندىق ساراپشى مۋرات ءباحاديروۆتىڭ پايىمىنشا، ەندى مەملەكەتتەر ورتاق ۇستانىمعا ۇيىپ، ءوزارا ينتەگراتسيادا جۇمىس ىستەۋى ءتيىس.
«قازىر ورتالىق ازيا ەلدەرى مەن قىتاي قارىم- قاتىناسىندا بار مۇمكىندىكتەر مەن ماسەلەلەردى قاراستىرىپ جاتىرمىز. وسى ديالوگ الاڭىن پايدالانا وتىرىپ، تۇيتكىلدەردىڭ شەشۋ جولدارىن ىزدەستىرەمىز. ول ءبىزدىڭ بولاشاق بايلانىسىمىزدى نىعايتا ءتۇسۋ ءۇشىن كەرەك. قىتايمەن قارىم- قاتىناس ءۇشىن بىزگە ايماق ەلدەرىنىڭ ورتاق پوزيتسياسىن قالىپتاستىرۋ ماڭىزدى. بۇل الداعى ۋاقىتتاعى جوسپارلاردىڭ جۇيەلى ورىندالۋىنا نەگىز بولماق»، - دەدى وزبەكستانداعى الەمدىك ەكونوميكا جانە ديپلوماتيا ۋنيۆەرسيتەتىنىڭ كافەدرا دوتسەنتى مۋرات باحاديروۆ.
فورۋم قورىتىندىسى بويىنشا ءار ەلدەن كەلگەن تالداۋ ورتالىعىنىڭ ماماندارى ءوز ۇكىمەتتەرى ءۇشىن ۇسىنىستار لەگىن ازىرلەمەك.
