ورتالىق ازيا مەن اراب ەلدەرىنىڭ سىرتقى ىستەر مينيسترلەرى تاشكەنتتە كەزدەستى
تاشكەنت. KAZINFORM - بۇگىن تاشكەنتتە سىرتقى ىستەر مينيسترلەرىنىڭ «ورتالىق ازيا - پارسى شىعاناعىنداعى اراب مەملەكەتتەرىنىڭ ىنتىماقتاستىق كەڭەسى» ستراتەگيالىق ديالوگىنىڭ ەكىنشى كەزدەسۋى ءوتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
باس قوسۋعا قاتار، باحرەين، كۋۆەيت، ساۋد ارابياسى، ومان، ازەربايجان جانە ورتالىق ازيا ەلدەرى سىرتقى ساياسي ۆەدومستۆولارىنىڭ باسشىلارى مەن ورىنباسارلارى قاتىستى.
كەزدەسۋ بارىسىندا مينيسترلەر ساياسات، قاۋىپسىزدىك، ساۋدا-ەكونوميكالىق، ينۆەستيتسيالىق، كولىك-لوگيستيكالىق جانە «جاسىل» ەنەرگەتيكانى دامىتۋ ماسەلەلەرىن تالقىلادى. سونداي-اق، دەلەگاتتار حالىقارالىق جانە وڭىردەگى وزەكتى ماسەلەلەر بويىنشا، اتاپ ايتقاندا اۋعانستان، تاياۋ شىعىستاعى جاعداي، پالەستينا-يزرايل قاقتىعىسى سياقتى ءبىرقاتار تاقىرىپ توڭىرەگىندە پىكىر الماستى.
«ءبىزدىڭ ەلدەرىمىز اراسىنداعى ىنتىماقتاستىقتىڭ تەرەڭ تاريحى بار. سوندىقتان «ورتالىق ازيا - پارسى شىعاناعىنداعى اراب مەملەكەتتەرىنىڭ ىنتىماقتاستىق كەڭەسى» ديالوگىنا قىزىعۋشىلىق باسىم. مۇنى قازاقستان تاراپى ىنتىماقتاستىقتى نىعايتۋ، حالىقارالىق جانە وڭىرلىك كۇن تارتىبىندەگى وزەكتى ماسەلەلەردى تالقىلاۋ، سونداي-اق ءتۇرلى سالاداعى بايلانىستاردى ارتتىرۋدىڭ ءتيىمدى تاسىلدەرىن ىزدەستىرەتىن حالىقارالىق الاڭ رەتىندە قاراستىرادى. جاھاندىق قاۋىپ پەن وڭىرلىك تاۋەكەلدەردىڭ ۇدەي تۇسكەنىنە قاراماستان ورتالىق ازيا ايماعى ءوزىنىڭ تۇراقتىلىعىن كورسەتىپ، ودان ءارى ءوسۋ مەن دامۋ ءۇشىن الەۋەتىن ۇتىمدى پايدالانىپ كەلەدى»، - دەپ توقتالدى كەزدەسۋگە قاتىسقان ق ر سىرتقى ىستەر ءمينيسترىنىڭ ورىنباسارى الىبەك باقايەۆ.
ايتا كەتەيىك، بۇل جولعى مينيسترلەر جۇزدەسۋى 2025-جىلى سامارقاندا مەملەكەت باسشىلارىنىڭ دەڭگەيىندە وتەتىن «ورتالىق ازيا - پارسى شىعاناعىنداعى اراب مەملەكەتتەرىنىڭ ىنتىماقتاستىق كەڭەسى» ستراتەگيالىق ديالوگىنىڭ ەكىنشى سامميتىنە دايىندىق سانالادى.
