ورتالىق ازيا ەلدەرى اراسىندا ەلەكتروندىق سيفرلىق قولتاڭبانى ءوزارا تانۋ ۇسىنىلدى

ورتالىق ازيا فينتەح قاۋىمداستىعىنىڭ ءتوراعاسى وتابەك ناسيروۆتىڭ ايتۋىنشا، بۇگىندە كومپانيالار كورشىلەس ەلدەردىڭ نارىعىنا شىعۋ كەزىندە سيفرلىق كەدەرگىلەرگە تاپ بولادى.

- سيفرلىق ەكونوميكا تۋرالى ايتقاندا، ەڭ الدىمەن ترانسشەكارالىق تولەمدەردى جەڭىلدەتۋ قاجەت. ەكىنشىدەن، ەلەكتروندىق سيفرلىق قولتاڭبالاردى ءوزارا تانۋ ماسەلەسىن شەشۋىمىز كەرەك. بۇل بيزنەس ءۇشىن وتە ماڭىزدى، - دەدى ول.

سونداي-اق ەلەكتروندىق شوت-فاكتۋرالارمەن جۇمىستى جەڭىلدەتۋ جانە دەربەس دەرەكتەردى قورعاۋ تالاپتارىن بۇزباي، ەلدەر اراسىندا قاجەتتى اقپارات الماسۋعا مۇمكىندىك بەرەتىن تەحنولوگيالىق شەشىمدەر ازىرلەۋ ۇسىنىلدى.

وتابەك ناسيروۆ مىسال رەتىندە قازاقستانداعى ساتۋشىنىڭ وزبەكستانداعى ماركەتپلەيستە جەكە كابينەت اشۋ جاعدايىن كەلتىردى. تىركەلۋ ءۇشىن ول سيفرلىق سايكەستەندىرۋدەن ءوتۋى كەرەك. الايدا ەكى ەلدىڭ ەلەكتروندىق سيفرلىق قولتاڭباسى ءار ەلدىڭ ۇلتتىق جۇيەسى اياسىندا جۇمىس ىستەيدى.

- ءبىز ازاماتتاردىڭ دەربەس دەرەكتەرى تۋرالى زاڭنامانى بۇزباي، ۇكىمەتتەر ءوزارا كەلىسكەن جاعدايدا قاجەتتى اقپارات الماسۋعا مۇمكىندىك بەرەتىن العىشارتتار جاساعىمىز كەلەدى. وسىلايشا، ازاماتتار جۇمىس ىستەگىسى كەلەتىن پلاتفورمالاردا كەدەرگىسىز تىركەلە الار ەدى، - دەپ ءتۇسىندىردى ول.

ۇسىنىلىپ وتىرعان ءتاسىل ءار ەلدىڭ ۇلتتىق سيفرلىق جۇيەسى مەن زاڭناماسىن ساقتاي وتىرىپ، ولاردىڭ ءوزارا ۇيلەسىمدى جۇمىس ىستەۋ تەتىكتەرىن قالىپتاستىرۋدى كوزدەيدى. باستاماشىلاردىڭ پىكىرىنشە، بۇل فينتەح كومپانيالارىنىڭ، ەلەكتروندىق ساۋداعا قاتىسۋشىلاردىڭ جانە وڭىردەگى سيفرلىق پلاتفورمالاردا جۇمىس ىستەيتىن ساتۋشىلاردىڭ قىزمەتىن جەڭىلدەتۋگە مۇمكىندىك بەرەدى.

بۇعان دەيىن دوڭگەلەك ۇستەلدە ورتالىق ازيا ەلدەرىنىڭ بيزنەس جانە ساراپشىلار قاۋىمداستىعى وكىلدەرى ءوڭىردىڭ سيفرلىق ينتەگراتسياسى جونىندەگى ۇكىمەتارالىق كەلىسىم جوباسىن تالقىلادى. قۇجات ءبىرىڭعاي زاڭناما نەمەسە ۇلتتىق ورگانداردان جوعارى تۇراتىن ءبىرىڭعاي رەتتەۋشى قۇرماي- اق، بەس ەلدىڭ سيفرلىق جۇيەلەرىنىڭ ءوزارا ۇيلەسىمدىلىگىن دامىتۋعا باعىتتالعان.

بۇعان دەيىن قازاقستاننىڭ IT- ەكسپورتى 1,1 ميلليارد دوللارعا جەتكەنىن جازعان ەدىك.