ورتالىق ازيا ەلدەرى قاۋىپسىزدىكتىڭ ءۇش باعىتىندا كۇش بىرىكتىرمەك
استانا. KAZINFORM - ەلوردادا ورتالىق ازيا ەلدەرىنىڭ قاۋىپسىزدىك كەڭەسى حاتشىلارىنىڭ ءبىرىنشى وتىرىسى ءوتتى.
«ءبىزدىڭ مەملەكەتتەرىمىزدىڭ پرەزيدەنتتەرىنىڭ ماقساتكەرلىك كۇش-جىگەرىنىڭ جانە ءبىرىزدى قادامدارىنىڭ ارقاسىندا ورتاازيالىق ىقپالداستىق جاڭا دەڭگەيگە شىعىپ وتىر. بۇل ەلدەرىمىز اراسىندا ورناعان سەنىم، دوستىق پەن تاتۋكورشىلىكتىڭ سان عاسىرلىق دانەكەرىن نىعايتۋعا دەگەن ۇمتىلىستى بىلدىرەدى. قارىم-قاتىناسىمىزدى تەرەڭدەتۋدە ورتالىق ازيا مەملەكەتتەرى باسشىلارىنىڭ كونسۋلتاتۆتىك كەزدەسۋى ماڭىزدى رولگە يە. ءوزارا ءىس-قيمىلدىڭ بۇل فورماتى ساۋدا، ونەركاسىپتىك كووپەراتسيا، ەنەرگەتيكا، كولىك پەن لوگيستيكا سالالارىنداعى جان-جاقتى ىنىتماقتاستىقتىڭ دامۋىنا ايتارلىقتاي سەرپىن بەردى»، - دەدى كەزدەسۋ بارىسىندا قازاقستان قاۋىپسىزدىك كەڭەسىنىڭ حاتشىسى عيزات نۇرداۋلەتوۆ.
وسى ورايدا ول قازىرگى ۋاقىتتا وسى جىلدىڭ تامىزىندا استانادا وتەتىن VI سامميتكە دايىندىق قارقىندى ءجۇرىپ جاتقانىن باسا ايتتى.
«گەوساياسي جانە گەوەكونوميكالىق تۋربۋلەنتتىلىك ءوڭىرىمىزدىڭ قاۋىپسىزدىك جاي- كۇيىنە تەرىس اسەرىن تيگىزەدى. بۇگىنگى بىزبەن كەزدەسۋدە قازاقستان پرەزيدەنتى توقايەۆ قاسىم-جومارت كەمەل ۇلى اتاپ وتكەندەي، ورتالىق ازيا ەلدەرى قاۋىپسىزدىك كەڭەسىنىڭ حاتشىلارى دەڭگەيىندەگى كەزدەسۋلەر سىرتقى جانە ىشكى قاۋىپ-قاتەرلەرگە قارسى تۇرۋدا كۇش-جىگەردى بىرىكتىرۋ الاڭى بولۋعا باعىتتالعان. سونىمەن قاتار ءبىزدىڭ ءوزارا ءىس-قيمىل فورماتىمىز ساياسي جانە ساۋدا-ەكونوميكالىق ىنتىماقتاستىقتى دامىتۋداعى وڭ ديناميكانى نىعايتۋعا سەپتىگىن تيگىزەدى دەپ ەسەپتەيمىز. وسى مۇمكىندىكتى پايدالانىپ، قازاقستانداعى سۋ تاسقىنىنا بايلانىستى باۋىرلاستىق تىلەكتەستىگىن جانە گۋمانيتارلىق كومەگىن كورسەتكەن ءسىزدىڭ ەلدەلرىمىزدىڭ شىنايى ريزاشىلىعىمدى بىلدىرۋگە رۇقسات ەتىڭىزدەر. ءبىز باستاپقى كەزەڭدە ءۇش تارماققا جۇمىلىپ، ولاردى جۇزەگە اسىرۋ ءۇشىن دايەكتى تۇردە ىلگەرىلەۋگە ۋاعدالاستىق. ءبىرىنشى - سۋ- ەنەرگەتيكالىق قاۋىپسىزدىگى، ەكىنشى - ازىق-تۇلىك قاۋىپسىزدىگى، ءۇشىنشى - ورتالىق ازيا ەلدەرىنىڭ قاۋىپسىزدىگى مەن كولىك-لوگيستيكالىق الەۋەتتى دامىتۋ»، - دەدى ول.
اۆتور
مارلان جيەمباي
