ورتالىق ازيا ەلدەرى قاۋىپسىزدىك كەڭەستەرى حاتشىلارىنىڭ ءبىرىنشى كەزدەسۋى ءوتتى
استانا. KAZINFORM - استانا قالاسىندا ورتالىق ازيا ەلدەرى قاۋىپسىزدىك كەڭەستەرى حاتشىلارىنىڭ ءبىرىنشى وتىرىسى ءوتتى.
باس قوسۋعا قازاقستان رەسپۋبليكاسى قاۋىپسىزدىك كەڭەسىنىڭ حاتشىسى عيزات نۇرداۋلەتوۆ قاتىستى، دەپ حابارلايدى اقوردانىڭ باسپا ءسوز قىزمەتى.
جيىن بارىسىندا وڭىرلىك جانە حالىقارالىق قاۋىپسىزدىكتىڭ وزەكتى ماسەلەلەرى، سونىڭ ىشىندە سۋ-ەنەرگەتيكالىق جانە ازىق-تۇلىك قاۋىپسىزدىگى سالالارىنداعى ىنتىماقتاستىقتى دامىتۋ ءىسى جان-جاقتى قاراستىرىلدى.
سونىمەن قاتار تاراپتار ورتالىق ازيا ەلدەرىنىڭ كولىك قاۋىپسىزدىگى مەن كولىك-لوگيستيكا الەۋەتىن دامىتۋ اسپەكتىلەرىن تالقىلادى.
قازاقستان رەسپۋبليكاسى قاۋىپسىزدىك كەڭەسىنىڭ حاتشىسى ارىپتەستەرىنە اتالعان ماسەلەلەر بويىنشا ەلىمىزدىڭ ۇستانىمى تۋرالى مالىمەت بەردى. سونداي-اق ترانسشەكارالىق وزەندەردىڭ رەسۋرستارىن ءتيىمدى باسقارۋ، سۋدى تەڭدەي ءارى ءادىل پايدالانۋ قاعيداتتارىنا نەگىزدەلگەن بىرىكتىرىلگەن سۋ ساياساتىن ازىرلەۋ جانە ونى جۇزەگە اسىرۋ، ءوزارا مىندەتتەمەلەردى مۇلتىكسىز ورىنداۋ جونىندەگى ىنتىماقتاستىقتى دامىتۋعا قاتىستى ءبىرقاتار ۇسىنىس ايتتى.
ورتالىق ازياداعى ازىق-تۇلىك قاۋىپسىزدىگىن قامتاماسىز ەتۋدىڭ ورتاق ستراتەگيالىق تاسىلدەرىن قالىپتاستىرۋ، سونداي-اق ايماقتىڭ ەكونوميكالىق بايلانىستارىن نىعايتۋ ماقساتىندا كولىك دالىزدەرىن ودان ءارى دامىتۋ قاجەت ەكەنى اتاپ ءوتىلدى.
ءبىرىنشى كەزدەسۋدىڭ قورىتىندىسى بويىنشا تاراپتار وڭىرلىك قاۋىپسىزدىكتى نىعايتۋ سالاسىنداعى تىعىز ىنتىماقتاستىقتى جالعاستىرۋعا دايىن ەكەنىن ءبىلدىردى.
