ورتاشا جىلدامدىقتى اسىرعان جۇرگىزۋشىلەرگە ايىپپۇل قاشان سالىنادى

استانا. KAZINFORM - قازاقستانداعى رەسپۋبليكالىق ماڭىزداعى اۆتوجولداردا ءار كولىكتىڭ ورتاشا جىلدامدىعىن ولشەيتىن ارنايى جۇيە ورناتىلىپ جاتىر.

«قازىر ءبىزدىڭ كامەرالاردى اكىمشىلىك قۇقىق بۇزۋشىلىقتىڭ ءبىرىڭعاي ءتىزىلىمى جۇيەسىنە قوسىپ ورناتۋ ءجۇرىپ جاتىر. جەلتوقسان ايىنىڭ ورتاسىنا قاراي بۇل ينتەگراتسيانى اياقتايمىز دەپ ويلايمىن. وسىدان كەيىن ەرەجە بۇزۋ دەرەكتەرىن ەسەپكە الۋ باستالادى»، - دەدى كولىك ءمينيسترى مارات قارابايەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

مينيستر بۇل كامەرالار جول ەرەجەسىن ورەسكەن بۇزاتىن ادامداردى انىقتاۋ ماقساتىندا قويىلىپ جاتقانىن ايتتى.

ونىڭ سوزىنە قاراعاندا، «استانا-بۋراباي» جولىندا ساعاتىنا 140 كيلومەتر جىلدامدىقپەن جۇرۋگە رۇقسات ەتىلگەن. الايدا وسى جولدا ساعاتىنا 200 كيلومەتردەن جوعارى جىلدامدىقپەن ءجۇرىپ وتكەن انىقتالعان.

سونىمەن قاتار م. قارابايەۆ قالا ىشىندەگى جولداردا ورتاشا جىلدامدىقتى باقىلايتىن جۇيە ورناتىلمايتىنىن اتاپ ءوتتى.

وسىعان دەيىن زاڭناماعا «كولىكتىڭ ورتاشا جىلدامدىعى» تۇسىنىگى ەنگىزىلىپ، بۇل ءتارتىپ ۇلكەن تاس جولداردا قولدانىلۋى مۇمكىن ەكەنىن جازعان ەدىك.