ورتاعاسىرلىق سارايشىق قالاسىنىڭ تاريحى قايتا جاڭعىرادى - ايدا بالايەۆا
اتىراۋ. KAZINFORM - اتىراۋ وبلىسىنداعى ورتاعاسىرلىق سارايشىق قالاسىنىڭ تاريحى قايتا جاڭعىرادى. بۇل تۋرالى مادەنيەت جانە اقپارات ءمينيسترى ايدا بالايەۆا ايتتى.
ءمينيستردىڭ دەرەگىنە سۇيەنسەك، ەلىمىزدە اسپان استىنداعى 12 مۋزەي بار. ونىڭ ىشىندە، سارايشىق مۋزەي-قورىعى دا بار.
«سارايشىق - قازاق دالاسىنداعى ەڭ كونە قالانىڭ ءبىرى. مۋزەيدىڭ اينالاسىندا زيراتتار بار. سۇيەكتەر شاشىلىپ جاتىر. مۇنىڭ ءبارىن تازالاۋ، رەتتەۋ جەرگىلىكتى اكىمشىلىكتىڭ نازارىندا بولادى. بۇل جۇمىستار اياقتالعان سوڭ، 2025-جىلدان كەيىن بىرلەسكەن ەكسپەديتسيا جۇمىسىن باستايمىز. ءبىر اي بۇرىن سارايشىق مۋزەي- قورىعىنىڭ ۇجىمىمەن كەزدەسىپ، حالىقارالىق دەڭگەيدە تانىتۋ ماسەلەسىن تالقىلادىق. باكۋدەگى تۇركى الەمىنىڭ مادەنيەتىن دامىتۋ قورى اياسىندا بىرلەسكەن ەكسپەديتسيا ۇيىمداستىرۋ، سارايشىق قالاسىن قايتا جانداندىرۋ ماسەلەسىن قاراستىراتىن بولامىز»، - دەدى ايدا بالايەۆا.
ەسكە سالا كەتەلىك، بۇدان بۇرىن مەرەكە قۇلكەنوۆ سارايشىقتىڭ تاريحىن زەرتتەۋ، قۇندىلىعىن ناسيحاتتاۋ جەتىسپەيتىنىن ايتقان ەدى.
