ورمان جانە تابيعات قورعاۋ قىزمەتكەرلەرىنىڭ جالاقىسىن كوتەرۋگە 8,5 ميلليارد تەڭگە قاراستىرىلعان - ۇكىمەت
استانا. KAZINFORM - بيىلعى 1-شىلدەدەن باستاپ ەلىمىزدىڭ ورمان جانە تابيعات قورعاۋ مەكەمەلەرىنىڭ قىزمەتكەرلەرى لاۋازىمدىق جالاقىلارىنا ۇستەمەاقى الا باستايدى.
ءتيىستى قاۋلىعا ق ر پرەمەر-ءمينيسترى ولجاس بەكتەنوۆ قول قويدى.
اتاپ ايتقاندا، ورمان جانە تابيعات قورعاۋ ۇيىمدارىنىڭ قىزمەتكەرلەرىنە ەڭبەكاقى تولەۋ جۇيەسىن، شارتتارى مەن مولشەرىن جاقسارتۋ ماقساتىندا «ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» ق ر ۇكىمەتىنىڭ قاۋلىسىنا وزگەرىستەر ەنگىزىلدى.
قۇجاتقا سايكەس ورمان ءورتىن ءسوندىرۋ ستانسالارىنىڭ، ورمان مەكەمەلەرىنىڭ، تابيعات قورعاۋ جانە ورمان ورنالاستىرۋ ۇيىمدارىنىڭ قىزمەتكەرلەرى لاۋازىمدىق جالاقىلارىنا %100 عا دەيىن ۇستەمەاقى الادى. ولاردىڭ ىشىندە ورمان ءورتىن سوندىرۋشىلەر، ءورت ءسوندىرۋ ماشينالارىنىڭ جۇرگىزۋشىلەرى، تراكتورشى- ماشينيستەر، راديووپەراتورلار، ءورت ءسوندىرۋ ماشينالارىن، جابدىقتارى مەن اپپاراتۋرالارىن جوندەيتىن سلەسارلار، ءورت- باقىلاۋ مۇناراسىنىڭ باقىلاۋشىلارى بار.
سونداي- اق 113 اۆياتسيالىق كۇزەت ءورت ءسوندىرۋشى- دەسانتشىسىنىڭ جالاقىسى كوتەرىلەدى.
قاۋلىنى ىسكە اسىرۋعا 2024-2027 -جىلدارعا ارنالعان رەسپۋبليكالىق بيۋدجەتتەن 8480,1 ميلليون تەڭگە كولەمىندە قارجىلىق شىعىندار كوزدەلگەن.
بارلىعى 3300 گە جۋىق قىزمەتكەر قوسىمشا اقىمەن قامتىلاتىن بولادى.
جەرگىلىكتى اتقارۋشى ورگانداردىڭ ورمان شارۋاشىلىعى مەكەمەلەرىنىڭ ورمان ءورتىن ءسوندىرۋ ستانسالارىنىڭ 1619 قىزمەتكەرىنە قوسىمشا اقى تولەۋدى قارجىلاندىرۋ جەرگىلىكتى بيۋدجەت قاراجاتى ەسەبىنەن جوسپارلانادى.
بۇعان دەيىن ق ر پارلامەنتى سەناتىنىڭ دەپۋتاتى و. ا. بۋلاۆكينانىڭ سۇراۋىنا جاۋاپ بەرە وتىرىپ، ۇكىمەت باسشىسى ورمان جانە تابيعاتتى قورعاۋ مەكەمەلەرىنىڭ بارلىق قىزمەتكەرلەرىنىڭ جالاقىسىن كوتەرۋ ماسەلەسى ءوزىنىڭ تۇراقتى باقىلاۋىندا ەكەنىن جانە ءتيىستى قاۋلىنىڭ جوباسى دايىندالعانىن ايتتى. دەپۋتات «سەمەي ورمانى» ر م م بورودۋليحا فيليالىنىڭ قىزمەتكەرلەرى ءۇشىن قوسىمشا اقىلار تاقىرىبىن كوتەردى.
ەستەرىڭىزگە سالا كەتەيىك، 2023 -جىلدىڭ شىلدەسىندە مەملەكەت باسشىسى ق. توقايەۆتىڭ تاپسىرماسىن ىسكە اسىرۋ اياسىندا ورمان قۇرىلىمدارى قىزمەتكەرلەرىنىڭ ومىرىنە جانە دەنساۋلىعىنا قاۋىپ توندىرەتىن جۇمىسى ءۇشىن لاۋازىمدىق جالاقىلارىنا %100 ۇستەمەاقى بەلگىلەندى.
