ورالدىق وقۋشى حالىقارالىق درون ۇشىرۋ چەمپيوناتىندا ۇزدىك اتاندى
ورال. KAZINFORM - تاتارستاننىڭ استاناسى قازان قالاسىندا درون جارىسىنان العاشقى حالىقارالىق مۋلتيسپورتتىق Games of the Future تۋرنيرى ءوتتى. وعان الەمنىڭ 107 ەلىنەن، سونىڭ ىشىندە قىتاي، وڭتۇستىك كورەيا، فرانسيا جانە باسقا ەلدەردەن 2000 نان استام سپورتشى قاتىستى.
جارىس قورىتىندىسى بويىنشا قازاقستاندىقتار درون ۇشىرۋ بويىنشا ۇزىك 6 كومانداعا كىردى.
Positive Technologies — «دروندار جارىسى» كۋرسى بويىنشا اۋقىمدى چەمپيوناتتا قازاقستان نامىسىن «ASpan» دەپ اتالاتىن قۇراما قورعادى.
ونىڭ قۇرامىندا ورال قالاسىنىڭ № 44 مەكتەپ-گيمنازياسىنىڭ وقۋشىسى دانيال كازيموۆ بولدى. ول نەبارى 15 جاستا، دروندارمەن اينالىسا باستاعانىنا كوپ بولماسا دا، حالىقارالىق جارىستارعا قاتىسىپ ۇلگەردى.
«دروندارمەن قازان ايىنان بەرى اينالىسىپ ءجۇرمىن. ءوزىم دە تاڭ قالدىم، سەبەبى مۇنداي دەڭگەيگە قول جەتكىزۋ — وتە كەرەمەت. جارىستىڭ اۋقىمى دا ۇلكەن»، — دەدى جاس درون ۇشىرعىش دانيال كازيموۆ.
ايتا كەتەيىك، ASpan — ورال قالاسىنان كەلگەن درون- جارىس بويىنشا كاسىبي كوماندا.
«ASpan — دروندار جارىسى» كۋرسىندا قازاقستاننىڭ اتىنان قاتىسقان جالعىز كوماندا. سونىمەن قاتار، قازاقستاندىق كوماندا العاش رەت وسى ساناتتاعى حالىقارالىق جارىستارعا قاتىستى. مۇندا ءارتۇرلى ەلدەردىڭ ۇزدىك ۇشقىشتارى ءوز داعدىلارىن كورسەتۋ ءۇشىن باس قوستى. وسىنداي كوپتەگەن كوماندالاردىڭ ىشىنەن ءبىز التىنشى ورىنعا يە بولدىق، بۇل - جاقسى كورسەتكىش. دانيال درون باسقارۋ بويىنشا قازاقستاننىڭ ۇزدىك ۇشقىشى اتاندى»، - دەپ اتاپ ءوتتى ASpan Drone قوعامدىق بىرلەستىگىنىڭ نەگىزىن قالاۋشى اسلانبەك امينوۆ.
ايتا كەتەيىك، 250 مىڭ دوللار جۇلدە قورى ءۇشىن بەلارۋس، بولگاريا، ۆەنگريا، گەرمانيا، ءۇندىستان، قازاقستان، قىتاي، رەسەي، سەربيا، تۇركيا، فرانسيا جانە وڭتۇستىك كورەيا كوماندالارى باق سىناستى.
«بولاشاق ويىندارى» شىنايى جانە ۆيرتۋالدى ولشەمدەردەگى فيدجيتال-پاندەر بويىنشا ەكىنشى مۋلتيسپورتتىق تۋرنير 2025-جىلى وتەدى.
قازاقستان مەن وزبەكستان حالىقارالىق جارىستاردى قابىلداۋعا نيەت ءبىلدىردى.
ەستەرىڭىزگە سالا كەتەيىك، «بولاشاق ويىندارى» - جالپى جۇلدە قورى 10 ميلليون دوللار بولاتىن ديدجيتال-سپورت تۇجىرىمداماسىنداعى العاشقى حالىقارالىق مۋلتيسپورتتىق تۋرنير.
تۋرنير 21-اقپان مەن 3-ناۋرىز ارالىعىندا قازاندا ءوتتى.
تۋرنيرگە الەمنىڭ ءتۇرلى ەلدەرىنەن 260 تان استام حالىقارالىق كوماندا جانە ەكى مىڭنان استام قاتىسۋشى قاتىستى.
اۆتور
جانات قاپالبايەۆا
