ورالدان اتىراۋعا 280 نەن استام اسكەري قىزمەتشى كومەككە اتتاندى
ورال. KAZINFORM - قىزىلوردا مەن ماڭعىستاۋ وبلىستارى توتەنشە جاعداي دەپارتامەنتتەرىنىڭ جەكە قۇرامى جانە ت ج مينيسترلىگى قاراعاندى قالاسىنداعى 52859-اسكەري ءبولىمىنىڭ اسكەرلەرى ورال قالاسىنان جايىق وزەنىنىڭ تومەنگى اعىسىندا ورنالاسقان اتىراۋ وبلىسىنا كومەككە اتتاندى.
جولعا جينالعان 281 قىزمەتكەردى شىعارىپ سالۋ راسىمىندە وبلىس اكىمىنىڭ ورىنباسارى قاليار ايتمۇحامبەتوۆ ءوڭىر باسشىسى ناريمان تورەعالي ۇلىنىڭ اتىنان قيىن ساتتە قولداۋ بىلدىرگەندەرى ءۇشىن اسكەري ماماندارعا ريزاشىلىعىن ءبىلدىرىپ، العىسحاتتار تابىس ەتتى.
باتىس قازاقستان وبلىسىندا سۋ تاسقىنى بولىپ، توتەنشە جاعداي رەجيمى ەنگىزىلگەن كەزدە وزگە وڭىرلەردەن اسكەري قۇرىلىمداردىڭ، ونىڭ ىشىندە توتەنشە جاعدايلار مينيسترلىگىنىڭ، ۇلتتىق ۇلاننىڭ، شەكارا قىزمەتىنىڭ جەكە قۇرامدارى كەلگەن بولاتىن. ولار سۋ تاسقىنىنىڭ الدىن الۋعا اتسالىستى.
قازىرگى تاڭدا وبلىس كولەمىندە سۋ تاسقىنىنا قاتىستى جاعداي تۇراقتالىپ، جايىق وزەنىندەگى سۋ دەڭگەيى قاۋىپتى مەجەدەن ءتۇسىپ كەلەدى. سوعان بايلانىستى اسكەري قىزمەتشىلەردىڭ الدىڭعى لەگى كەيىن قايتا باستادى.
ەسكە سالا كەتەيىك، بۇدان بۇرىن جايىق وزەنىندەگى سۋ دەڭگەيى ورال قالاسى تۇسىندا تومەندەگەنىن جازعان بولاتىنبىز.
«قازاقستان حالقىنا» قوعامدىق قورى باتىس قازاقستاندا 114 تۇرعىن ءۇي سالماقشى.
ب ق و اكىمىنىڭ ورىنباسارى باتىس قازاقستاندا قاۋىپتىڭ ءالى سەيىلە قويماعاندىعىن ءمالىم ەتتى.
اۆتور
عايساعالي سەيتاق
