ورالدا «ۇرشىق پاتي» ءىس-شاراسى ءوتتى

ورال. KAZINFORM - بۇگىن ورال قالاسىنىڭ مادەنيەت جانە تىلدەردى دامىتۋ بولىمىنە قاراستى جاستار مادەنيەت سارايىنىڭ ۇيىمداستىرۋىمەن قالالىق كورمە زالىندا قولونەرشىلەر وداعىنىڭ مۇشەسى، قولونەر شەبەرى، «Urshyk» رەسپۋبليكالىق قوعامدىق بىرلەستىگىنىڭ پرەزيدەنتى بيبىگۇل لاۋباي قىزىنىڭ «ۇرشىق پاتي» ءىس-شاراسى وتكىزىلدى.

ءىس-شارانىڭ ماقساتى - ۇلتتىق قۇندىلىقتاردى دارىپتەۋ، قولونەر بۇيىمدارىنىڭ زاماناۋي ۇلگىسىن قولدانۋ ارقىلى قولونەرشىلەردىڭ جەكە برەندىن قالىپتاستىرۋ، جاستاردىڭ ۇلتتىق قۇندىلىقتارعا دەگەن قىزىعۋشىلىعىن ارتتىرۋ.

ءىس-شارادا شەبەرلىك ساعاتى ۇيىمداستىرىلىپ، قولونەر بۇيىمدارى تانىستىرىلىپ، قىز-كەلىنشەكتەرگە ۇرشىق ءۇيىرۋدىڭ قىر-سىرى كورسەتىلدى.

اتاۋلى ءىس-شاراعا ورال قالاسى اكىمىنىڭ ورىنباسارى ارسەن عۇباشيەۆ قاتىسىپ، باستامانىڭ وسكەلەڭ ۇرپاق ءۇشىن ماڭىزى زور ەكەنىن جەتكىزدى. سونىمەن قاتار «اتامەكەن» كوميۋنيتي ورتالىعىنىڭ «ساۋلەم-اي» اجەلەر ءانسامبلى مەن اسلان، جاسۇلان زينەدەنوۆتەر ونەر كورسەتتى.

ءىس-شارا سوڭىندا بيبىگۇل كاردەنوۆاعا وبلىس اكىمىنىڭ اتىنان العىس حات پەن ەستەلىك سىيلىق تابىس ەتىلدى. شەبەرلىك ساعاتىنا قاتىسقان قالا تۇرعىندارى العان اسەرىمەن ءبولىسىپ، «وسى سەكىلدى ۇلتتىق قۇندىلىقتاردى ناسيحاتتايتىن ءىس-شارالار كوبىرەك بولسا ەكەن» دەگەن ىزگى نيەتىن ءبىلدىردى.