ورالدا ەر ادام ءوز پاتەرىنە 100 گە جۋىق ادامدى تىركەگەن
ورال. KAZINFORM - ورال قالاسىندا ەر ادام ءوز پاتەرىنە 95 ادامدى تىركەگەن.

ب ق و پوليسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، كوشى- قون پوليتسياسىنىڭ قىزمەتكەرلەرى ازاماتتاردى تىركەۋ سالاسىندا زاڭ بۇزۋشىلىقتاردى انىقتادى. اتاپ ايتقاندا، ورال قالاسىنداعى پاتەرلەردىڭ بىرىندە وندا ناقتى تۇرمايتىن 95 ادامنىڭ تىركەلگەنى بەلگىلى بولدى.
- پاتەر يەسىنە قاتىستى اكىمشىلىك شارا قولدانىپ، ايىپپۇل سالىندى. ق ر اكىمشىلىك قۇقىق بۇزۋشىلىق تۋرالى كودەكسىنىڭ 493-بابىنا سايكەس تۇرعىن ءۇي- جايلاردىڭ يەلەرى ازاماتتاردى زاڭسىز تىركەگەن ءاربىر دەرەك ءۇشىن جاۋاپقا تارتىلۋى مۇمكىن. سونىمەن قاتار ءبىر جىل ىشىندە قايتالاپ بۇزۋ جاۋاپكەرشىلىكتى كۇشەيتۋگە اكەپ سوعادى. بۇدان باسقا، جەكە باسىن كۋالاندىراتىن قۇجاتتارسىز نەمەسە تىركەۋسىز تۇراتىن ادامدار كودەكستىڭ 492-بابى بويىنشا جاۋاپكەرشىلىككە تارتىلادى. ءبىر جىل ىشىندە قايتالانعان بۇزۋشىلىقتار ءۇشىن قاتاڭ سانكسيالار قاراستىرىلعان، - دەپ حابارلادى ۆەدومستۆودان.